‘Yupela i Mas Redi’
1 Long tok profet em i mekim long dispela taim bilong las de, Jisas i mekim tok lukaut long pasin bilong tingting tumas long ol samting bilong skin. (Mt. 24:36-39; Lu. 21:34, 35) Bikpela hevi tru bai kamap long wanpela taim yumi no save long en, olsem na em i bikpela samting long yumi bihainim tok lukaut bilong Jisas: “Yupela tu i mas redi. Pikinini Bilong Man bai i kam long wanpela taim yupela i no ting em bai i kam.” (Mt. 24:44) Wanem samting inap helpim yumi long redi?
2 Daunim Wari na Ol Samting i Laik Pulim Tingting: Wanpela samting inap bagarapim yumi long ol samting bilong spirit na yumi mas lukaut long en, em pasin bilong “wari long ol samting bilong bodi.” (Lu. 21:34) Long sampela kantri, ol man i stap rabis, no gat wok skin, na pe bilong ol samting i go antap, olsem na i hatwok long ol man i kisim ol samting ol i mas i gat. Long sampela narapela kantri, em pasin bilong ol man long bungim planti samting bilong skin. Sapos yumi tingting oltaim long ol samting bilong skin, yumi inap lusim tingting long ol samting tru bilong Kingdom. (Mt. 6:19-24, 31-33) Ol miting Kristen i helpim yumi long tingim ol samting tru bilong Kingdom. Yu putim mak long go long olgeta miting?—Hi. 10:24, 25.
3 Dispela graun i pulap long ol samting em ol inap pulim nating taim bilong yumi. Kompiuta inap kamap olsem samting bilong pundaunim man sapos man i lusim bikpela hap taim long painim ol samting long Intenet, ritim na salim ol E-meil, o pilai kompiuta-gem. Bikpela hap taim inap lus long lukim televisen, video, pilai spot, na mekim ol samting yumi save laikim, o stori nating wantaim ol wantok, na dispela inap mekim na yumi no gat bikpela taim o strong bilong mekim ol wok bilong spirit. Pasin bilong malolo na mekim ol samting bilong kisim amamas inap helpim yumi long sotpela taim, tasol pasin bilong mekim stadi bilong yumi yet na stadi wantaim famili long Baibel bai helpim yumi inap oltaim oltaim. (1 Ti. 4:7, 8) Yu save makim hap taim bilong tingim tingim Tok Bilong God long olgeta wan wan de?—Ef. 5:15-17.
4 Yumi ken tenkyu tru olsem oganaisesen bilong Jehova i bin stretim rot bilong yumi ken kisim skul long ol samting bilong spirit bilong helpim yumi long ‘abrusim olgeta dispela samting i laik kamap, na bai yumi sanap long ai bilong Pikinini Bilong Man’! (Lu. 21:36) I gutpela yumi mekim gut wok long olgeta samting bilong spirit na “redi” na bai bilip bilong yumi i mekim na ‘taim Jisas Krais i kamap ples klia, em bai i amamas tru long yumi na givim biknem long yumi.’—1 Pi. 1:7.