Redim Ol Baibel-Stadi Bilong i Go Autim Tok

¹ Nambawan as na yumi mekim Baibel-stadi, em yumi laik kamapim ol nupela disaipel na bai ol tu i ken insait long wok bilong lainim man. (Mt 28⁠:​19, 20) Olsem na taim yumi stadi wantaim man, yumi mas helpim em long kisim save, na tu yumi mas helpim em long bilip strong na redim em long autim bilip bilong em. (2 Ko 4⁠:13) Yumi ken mekim wanem bilong helpim man na bai em tu inap mekim wok bilong lainim ol man?​—⁠2 Ti 2⁠:⁠2.

² Putim Wok Autim Tok Olsem Wanpela Mak Em i Mas Winim: Taim yu kirap stadi wantaim man long Baibel, tokaut klia olsem man i lotu tru long God em i mas ‘autim bilip bilong em na bai God i kisim bek em.’ (Ro 10⁠:10) Nem bilong yumi, em ol Witnes Bilong Jehova, i makim olsem yumi mas autim tok. Helpim em long save, wok yumi mekim bilong skulim em i no bilong helpim em tasol long kisim laip, nogat. Taim em yet i kamap tisa, man i harim tok bilong em, em tu inap kisim laip.​—⁠1 Ti 4⁠:⁠16.

³ Mekim Rivyu Long Ol Samting Yu Lainim Man Long En: Sampela taim yu ken mekim rivyu long ol samting yu bin lainim man long en​—⁠em i gutpela rot bilong skulim gut Baibel-stadi. Pasin bilong mekim rivyu i helpim Baibel-stadi long putim ol nupela tok em i lainim i go long bel na long tingting bilong em, na i helpim em long kamap strong long ol samting bilong spirit. Yumi yet i save pinis long dispela samting taim yumi bekim ol askim bilong rivyu bilong Stadi Wastaua. Redim sampela askim i klia na i no hatwok tumas long Baibel-stadi i bekim long toktok bilong em yet.

⁴ Yu ken mekim rivyu olsem yu autim tok long wanpela man. Kamapim wanpela askim o stori long wanpela samting i save kamap long taim yumi autim tok. Yu ken makim man bilong haus, na Baibel-stadi bilong yu i ken kamapim ol tok em bai mekim sapos em i bungim kain man olsem. Tokim em, em i mekim gutpela tok, na kamapim sampela tok bilong helpim em na bai narapela taim bihain em bai mekim gut moa yet. Dispela bai skulim em long olsem wanem em i ken mekim wok long samting em i lainim pinis na helpim em long mekim gutpela wok long Baibel.

⁵ Buk Reasoning: Sapos em i save long tok Inglis, givim buk Reasoning long em na lainim em long pasin bilong mekim wok long en. Soim em, olsem wanem buk i kamapim sampela pasin bilong kirapim tok, na bekim ol askim bilong Baibel, na bekim tok long man i no wanbel long sampela bilip bilong yumi. Taim yu mekim stadi, mekim wok long dispela buk bilong helpim Baibel-stadi long save long pasin bilong toktok wantaim ol man na bai ol i bilipim ol tok em i mekim. Dispela buk inap strongim em na bai em i no pret long toktok, na bai em yet i gat laik long autim tok bilong Kingdom.

⁶ Stori Gut Olsem Ol Miting i Bikpela Samting: Ol miting olsem Miting Bilong Wok Autim Tok na Skul Bilong Wok Autim Tok, ol i bilong redim yumi long autim tok. Ol brata i gat save ol i mekim sampela tok na soim bilong kamapim pasin bilong autim gut tok. Stori gut olsem ol miting ol i bikpela samting, na wok strong long helpim Baibel-stadi long kam long ol miting. Pasin bilong kam oltaim long miting inap kirapim em long kamap disaipel tru bilong Jisas.

⁷ No ken lusim tingting olsem yu yet yu mas makim gutpela pasin ol narapela i ken bihainim. Sapos yu amamas long autim tok long olgeta taim, dispela bai kamapim klia olsem yu pilim tru ol tok i tru. Dispela gutpela pasin yu mekim bai kirapim Baibel-stadi long mekim sampela wok moa bilong kamapim bilip bilong em. (Lu 6⁠:40) Ol dispela samting inap helpim ol nupela man long tingim wok bilong autim tok i olsem wanpela gutpela wok na bai ol i amamas long insait long en.​—⁠1 Ti 1⁠:⁠12.

[Ol Askim]

1. Wanem nambawan as na yumi mekim Baibel-stadi?

2. Yumi mas helpim Baibel-stadi long save long wanem samting?

3. (a) Pasin bilong mekim rivyu long ol samting yumi lainim man long en inap helpim em olsem wanem? (b) Long rivyu, yumi ken kamapim wanem kain askim?

4. Yumi ken mekim rivyu long wanem narapela rot?

5. Olsem wanem buk Reasoning i gutpela samting tru bilong helpim Baibel-stadi bilong yu?

6. Bilong wanem yumi mas kirapim Baibel-stadi long i kam long ol miting na laikim tru?

7. Olsem wanem gutpela pasin yu mekim inap helpim Baibel-stadi bilong yu?