Yu Save Planim Planti Kaikai?
1 Ol man i save tok, “Man i wok strong long mekim samting, em bai kisim planti samting.” Dispela tok em i tru moa yet long ol samting yumi mekim bilong lotuim God. Sapos yumi lusim bikpela hap taim na strong long redim ol tok bilong miting, na autim tok bilong Kingdom, na mekim pasin sori long ol brata bilong yumi, bai yumi kamap strong moa yet long ol samting bilong spirit. Tasol sapos yumi no laik wok strong o yumi no givim bel tumas long ol wok yumi mekim, bai yumi no kisim ol gutpela samting em inap kamap long dispela wok, a?
2 Long 2 Korin 9:6, aposel Pol i kamapim klia dispela samting, olsem: “Man i planim liklik kaikai, em bai i kisim liklik kaikai tasol. Na man i planim planti, em bai i kisim planti.” Olsem wanem? Yu save planim planti kaikai?
3 Stadi Long Baibel: Sapos yumi laik bai wok autim tok bilong yumi i kamapim gutpela kaikai, pastaim yumi mas wok strong long stadi long Baibel. Yumi mas hangre tru long ol kaikai bilong spirit. (Sng 119:97, 105; Mt 5:3) I gat planti samting yumi mas mekim long olgeta de, olsem na yumi mas wok strong long lainim gut bel na bai yumi ken pilim olsem yumi mas kisim ol samting bilong spirit yumi sot long en. Bilong mekim olsem, planti bilong yumi i mas stretim gut ol wok bilong yumi bambai yumi “gat taim bilong mekim pasin bilong God.” (Ef 5:16) Sampela ol i stretim rot na long sampela de ol i kirap long moningtaim tru na stadi. Na sampela i makim hap taim long apinun tru bilong ol i ken stadi. Bai yumi kisim planti kaikai olsem wanem? Bilip bilong yumi bai kamap strong moa, na gutpela samting yumi wetim bai kamap klia moa long tingting bilong yumi, na yumi bai kisim stretpela tingting long ol samting.—Ro 10:17; 15:4; 1 Pi 1:13.
4 Ol Miting Bilong Kongrigesen: Long Song 122:1, Devit i tok: “Ol i tokim mi olsem, ‘Goan, yumi go long haus bilong Bikpela.’ Ol i tok olsem na mi belgut tru.” Olsem wanem? Yu tu yu save belgut olsem? Sapos yu laik planim planti kaikai, yu mas i go long olgeta 5-pela miting. Yu mas tingting strong olsem yu no ken larim bikpela ren samting i pasim yu long go long miting. Sapos yumi winim planti hevi i laik pasim yumi long go long miting, bai yumi kisim planti blesing.
5 Kam kwik long miting, na taim miting i pinis yu no ken lusim kwik miting—long dispela rot bai yu inap toktok wantaim ol brata sista na strongim ol. Prenim ol narapela narapela brata sista—no ken prenim sampela tasol. Redim gut ol tok bilong Stadi Wastaua na ol narapela miting na bai yu inap bekim planti askim long taim yu gat rot long mekim—olsem planim planti kaikai. Sapos long taim bilong miting yu “givim samting bilong helpim ol arapela man, [yu] yet bai i kisim planti samting.”—Snd 11:25.
6 Autim Tok: Dispela tok, man i planim planti samting em bai kisim planti samting, em i kamap tru moa yet long wok autim tok. Sapos yumi lusim bikpela hap taim long autim tok, bai yumi kisim planti gutpela ekspiriens na wok bilong yumi long mekim ol gobek na Baibel-stadi bai karim gutpela kaikai.
7 Bilong planim planti samting long wok autim tok, yumi mas lusim bikpela hap taim, na tu, yumi mas mekim gut dispela wok. Sapos yumi save long tok Inglis, Buk Reasoning i gutpela samting tru bilong helpim yumi long mekim gut moa dispela wok. Long pes 9-15 i gat lista bilong 40 samting pasin bilong kirapim tok em ol i stori long 18-pela samting—ol i bilong helpim yumi long kirapim tingting bilong ol man bilong haus. Sapos yu bungim man i laik harim tok, yu mas raitim long notbuk, na dispela bai helpim yu long go bek lukim dispela man na kisim ol gutpela samting i kamap long dispela samting yu planim. Yu laik bai ol wok yu mekim i helpim yu long kirapim wanpela Baibel-stadi, na bai yu ken lainim em tu long pasin bilong planim planti kaikai.
8 Sapos yumi planim planti kaikai, bai yumi kisim sampela blesing moa long han bilong Jehova.—Mal 3:10.
[Ol Askim]
1. Bilong wanem em bikpela samting long yumi mas lusim bikpela hap taim na strong long mekim ol wok bilong Kingdom?
2. Long 2 Korin 9:6, aposel Pol i tok wanem long pasin bilong “planim kaikai”?
3. Bilong wanem em bikpela samting long yumi mas stadi long Baibel?
4. Yumi mas ting olsem wanem long ol miting?
5. (a) Yumi ken mekim wanem na bai yumi inap prenim sampela brata sista moa? (b) Wanem samting moa yumi mas mekim long ol miting?
6. Sapos yumi lusim bikpela hap taim long autim tok, bai yumi kisim wanem ol blesing?
7. Wanem samting i gutpela samting tru bilong helpim yumi long mekim gut moa wok autim tok?