Pasin Bilong Planim Planti Kaikai i Kamapim Planti Blesing
1 Yumi olgeta i wetim truim bilong ol gutpela tok promis i stap long Baibel. Tasol long nau tu, Jehova i save givim planti blesing i mekim na yumi stap amamas. Yumi bai kisim planti blesing moa yet sapos yumi wok strong. Olsem aposel Pol i tok, “man i planim planti, em bai i kisim planti.” (2 Ko. 9:6) Skelim tupela samting em yumi inap wok strong long en, olsem planim planti kaikai.
2 Wok Autim Tok Bilong Yumi: Pasin bilong autim gutnius long ol man taim yumi inap mekim, dispela i save kamapim planti blesing. (Snd. 3:27, 28) Planti ol i wok long planim planti kaikai long rot bilong mekim bikpela wok moa bilong autim tok, sampela i mekim wok painia haptaim na painia oltaim. Yumi olgeta inap planim planti kaikai taim yumi wok strong long mekim ol gobek na kirapim ol man long kisim sampela save moa, na taim rot i op yumi tokim ol long yumi laik mekim Baibel-stadi wantaim ol. (Ro. 12:11) Taim yumi wok strong long ol kain rot olsem, yumi bai kisim ol gutpela ekspiriens i strongim yumi na bai yumi kisim bikpela amamas moa long wok bilong yumi long autim tok.
3 Helpim Wok Bilong Kingdom: Pol i toktok long pasin bilong ‘planim planti kaikai’ taim em i stori long pasin bilong givim ol samting bilong skin. (2 Ko. 9:6, 7, 11, 13) Long nau, i gat planti samting yumi inap mekim bilong helpim wok bilong Kingdom, long rot bilong mekim wok o givim mani samting. Yumi inap helpim wok bilong sanapim ol Haus Kingdom na ol Haus Kibung. Na yumi inap klinim na lukautim gut ol dispela ples bilong mekim lotu i tru. Na tu, yumi inap givim mani bilong baim ol samting bilong kongrigesen, na bilong helpim wok bilong autim tok na kamapim ol disaipel long olgeta hap. Taim yumi olgeta i wok strong olsem, yumi amamas tru long lukim Jehova i blesim dispela wok em yet i bin givim yumi!—Mal. 3:10; Lu. 6:38.
4 Baibel i tokim yumi long ‘mekim planti gutpela pasin bilong helpim ol arapela manmeri na givim planti samting long ol manmeri i sot.’ Taim yumi bihainim dispela tok, yumi bai kisim planti blesing long nau. Na tu, yumi bai “bungim planti samting bilong helpim [yumi] bihain, na [yumi] bai i kisim dispela laip em i laip tru.”—1 Ti. 6:18, 19.