Tenkyu Long Ol Samting Yumi Kisim Pinis
1 “Yumi stap yet olsem ol manmeri bilong mekim sin, na Krais i dai bilong helpim yumi. Long dispela pasin God i bin soim yumi olsem, em i laikim yumi moa yet.” (Ro 5:8) Yumi olgeta i mas tenkyu tru long dispela bikpela samting God Jehova wantaim Pikinini bilong em i bin mekim bilong helpim yumi! Long rot bilong blut bilong Krais yumi inap kisim laip oltaim—no gat wanpela man long graun inap givim dispela samting long yumi.
2 Yumi ken mekim wanem bilong kamapim klia yumi tenkyu tru long dispela samting? Planti man i hangre long kisim stretpela save—em save i stap long Tok Holi Bilong God tasol. Jehova i laik bai ol i ken save long tok i tru. (1 Ti 2:4) Taim yumi “autim gutnius bilong kingdom bilong God,” yumi kamapim klia yumi laikim tru tok i tru. (Lu 4:43) Yumi givim bel tru long mekim dispela wok, na dispela i makim olsem yumi tenkyu long Krais i bin i dai bilong helpim yumi na yumi laik bihainim em na kamapim ol disaipel olsem em i tokim yumi long mekim.—Mt 28:19, 20.
3 Yumi ken autim tok olsem wanem? Yu ting long sampela mun yu inap mekim wok painia haptaim? Ating sampela, sapos ol i skelim gut ol samting pastaim, bai ol inap kamap painia oltaim. Sapos yumi mekim olsem, bai yumi inap lusim planti aua moa long autim gutnius bilong Kingdom. Ating bipo yu bin tingting long mekim wok painia, tasol sampela samting i bin pasim rot bilong yu. Tasol sapos nau ol samting bilong yu i senis, orait, olsem wanem? Yu bin tingting long mekim wok painia o wok painia haptaim?
4 Yumi tenkyu moa yet, taim yumi lukim pasin bilong kros pait na birua i go bikpela moa long olgeta hap. Pol i tok, long taim bilong yumi bai i gat “planti hevi nogut tru.” (2 Ti 3:1) Tru yumi stap namel long ol dispela hevi, tasol yumi gat planti gutpela samting yumi ken tokim ol man long en. Yumi gat tupela gutpela magasin, em Wastaua na Kirap!, na long dispela mun yumi ken tilim ol magasin wan wan o tilim sabskripsen. Na tu, yumi gat ol buklet i stori long ol narapela narapela samting. Ol dispela magasin na buklet inap strongim bel bilong man i kaunim. Yumi tenkyu long ol dispela samting yumi kisim pinis, na dispela i mas kirapim yumi long lusim planti aua long helpim ol narapela long kisim.—Hi 13:16.
5 Ating long hap yu stap long en, ol man i no tingim tumas ol samting bilong spirit. Tasol long sampela hap, planti man i hangre long tok i tru. Yu ting yu inap go stap long narapela hap long dispela kantri i no gat planti Witnes long en? Ating wasman sekit inap givim sampela tingting long yu bilong helpim yu long skelim gut dispela samting.
6 I gat planti as na yumi mas tenkyu long ol planti gutpela samting yumi kisim pinis. Nambawan samting yumi ken mekim bilong kamapim tenkyu bilong yumi long Jehova i olsem: Yumi mas tokaut long nem bilong em na ol samting em i laik mekim.—Ais 12:4, 5.