Gutnius Bilong Ol Man i Gat Pasin Daun
1 Long taim bilong yumi de bilong kot i klostu. (Ese 9:5, 6) Yumi no ken lusim taim long toksave long olgeta man i gat pasin daun na bai ol i ken redi long dispela samting. Jehova i gat pasin sori, olsem na em i makim ol lain bilong em long ‘bringim gutpela tok bilong em long ol man i gat pasin daun.’ (Ais 61:1, 2) Ol magasin bilong yumi i helpim yumi long tokaut long dispela gutnius long olgeta hap.
2 Wastaua na Kirap! i gat strongpela kaikai bilong spirit long en bilong kirapim na strongim yumi. Wastaua i strongim ol man i gat pasin daun long gutnius olsem klostu nau Kingdom bilong God bai mekim graun i kamap Paradais. Kirap! i strongim man long bilip long promis bilong God long nupela taim i gat bel isi na gutpela sindaun long en. Sapos yumi tilim dispela tupela magasin long olgeta hap bai gutnius inap go hariap long ol man i gat pasin daun. Yumi ken kamapim wanem tok bilong ol nupela magasin?
3 Yu ken tilim “Wastaua” bilong Me 1, na opim long hap “Kaunim Baibel Long Olgeta De—Dispela Bai Helpim Yu,” na kamapim askim olsem:
◼ “Taim yumi kaunim Baibel, yu ting dispela i helpim yumi olsem wanem? [Larim man i bekim tok.] Long Rom 15:4, Baibel yet i mekim sampela tok bilong bekim dispela askim. [Kaunim Rom 15:4.] Planti manmeri long hap bilong yumi ol i gat Baibel, tasol sampela tasol i save kaunim. Mipela i bilip olsem, Baibel tasol i kolim stret ol samting bai painim yumi long bihain, na sapos yumi kaunim Baibel dispela bai helpim yumi.” Mekim sampela tok moa i stret long man bilong haus, na tilim sabskripsen.
4 “Wastaua” bilong Me 15 i gat wanpela gutpela stori, em “Ol Tumbuna Bilong Yumi Bai Kisim Laip Gen.” Ating yu inap kirapim tingting bilong ol man long dispela tok:
◼ “Planti man i laik save long ol tumbuna bilong ol. Tasol ol i dai pinis na yumi no inap lukim ol, olsem na planti man i ting i nogat rot long save long ol. Yu ting i gat wanpela rot bilong yumi ken save long ol?” Larim man i bekim tok. Kaunim Jon 5:28, 29, na stori long tok promis bilong God long givim gen laip long ol long Paradais long graun.
5 Sapos yu tilim ol dispela magasin paslain long Me 14, yu mas tilim tu Kingdom Nius Namba 34 long olgeta manmeri i no kisim yet dispela nius. Oltaim yumi mas redi long tilim ol magasin na buk na buklet, long wanem, ating ol narapela insait long famili bilong man i bin kisim magasin o ol pren bilong em bai kaunim. (1 Ti 6:18) Dispela gutnius yumi bringim long ol man i gat pasin daun inap helpim ol long abrusim bagarap.—1 Ti 4:16.