Putim Mak na Bai Ol Inap Kisim Laip
1 Paslain long kamapim ol stretpela kot bilong em, Jehova i givim toksave na bai ol man i gat pasin daun i gat rot bilong abrusim bagarap. Long taim bilong Esekiel i gat ol man i bel hevi na wari long ol pasin nogut. Jehova i stretim rot bilong ol dispela man i kisim mak na bai ol inap stap laip. (Ese 9:4-6) Wok autim tok yumi mekim long nau, em rot bilong makim ol man wankain olsem bipo. Yumi inap mekim bikpela samting tru.
2 Pastaim yumi mas painim ol man i gat gutpela bel. Na yumi stretim rot bilong mekim gobek. Bilong redi long mekim gobek, yumi raitim long notbuk wanem buk yumi bin tilim na yumi bin stori long wanem samting. Sapos yumi redi gut na mekim stret ol samting taim yumi go bek, orait, nau rot i op na gutpela samting i ken kamap long dispela gobek.
3 Taim yu mekim gobek long man i kisim “Wastaua” yu ken stori long bikpela het-tok bilong en:
◼ “Lukim hia long namba wan pes bilong Wastaua i gat tok olsem ‘I Tokaut Long Kingdom Bilong Jehova.’ Dispela nius i narakain long olgeta narapela nius, long wanem, em i tokaut olsem Kingdom bilong God tasol inap stretim ol hevi bilong dispela graun. Dispela nius i tokaut long ol samting Kingdom bilong God bai mekim taim laik bilong God i kamap long graun. Dispela tok em gutnius Jisas i tok bai ol i autim long olgeta hap bilong graun.” Kaunim Matyu 24:14, na tokim man long wanem rot em i ken kisim Wastaua long olgeta taim, na olsem wanem em i ken mekim wok long en bilong stadi long Baibel.
4 Sapos yu laik kamapim tok bilong Baibel tasol na kirapim man long kaunim long olgeta taim, yu ken tok olsem:
◼ “Ating olgeta man i amamas long sampela gutpela tok bilong helpim ol long winim ol hevi bilong olgeta wan wan de. Yu ting bai yumi painim gutpela tok olsem long we? [Larim man i bekim tok.] Planti man i bin bilipim tok bilong sampela pren o ol saveman, tasol tok bilong ol i no bin helpim ol. Tasol planti milion manmeri i bin bihainim tok bilong Baibel na nau ol i save, Baibel i rot bilong kisim gutpela tok na ol i ken bilip long en. Baibel i skulim yumi long rot bilong winim olgeta kain hevi bilong yumi. Kaunim 2 Timoti 3:16, 17. Nau yu ken opim pes 247 long buk Stap Oltaim, na stori long sampela skripsa i soim yumi long rot bilong stretim ol hevi bilong famili long pasin sori.
5 Sapos yu laik kirapim wanpela Baibel-stadi yu ken mekim wok long buk “Yu Inap i Stap Oltaim Long Paradais Long Graun,” na kirapim tok olsem:
◼ “Yumi laikim famili bilong yumi na yumi laik ol gutpela samting i ken painim ol. Sapos famili bilong yu inap i stap long wanpela ples olsem dispela, yu ting dispela inap helpim ol olsem wanem?” Soim ol piksa long pes 156 na 157. Kaunim wanpela o tupela skripsa i stap long tupela pes, na stori olsem: dispela em ol promis God Jehova i mekim, na em i no ken giaman. Nau opim lista bilong ol sapta long pes 5 na 6, askim man bilong haus em i laik save tru long wanem tok bilong dispela buk, orait, opim sapta em i makim na stori long wanpela o tupela paragraf.
6 Yu laik helpim wanpela man long kisim mak na bai em inap kisim laip? Yu inap mekim olsem sapos yu ‘mekim tru wok bilong autim gutnius’ na yu redi gut na go bek long olgeta man i laik harim tok.—2 Ti 4:5.