Olgeta Tok Bilong Baibel i Gutpela Bilong Skulim Yumi
1 Tingting bilong ol man long ol gutpela tok bilong Baibel i planti na i narapela narapela kain. Tasol mipela i save tru olsem insait long Baibel i gat ol tok i kamapim klia rot bilong stretim kain kain hevi bilong ol man na ol gutpela tok bilong stiaim wokabaut bilong yumi wan wan. (Snd 3:5, 6) Olsem wanem yumi inap helpim ol narapela long save olsem ol i mas mekim wok long Baibel, skelim gut na lainim ol gutpela tok i tru i stap insait long en? Yu ken traim long mekim wok long sampela bilong ol dispela pasin bilong toktok taim yu laik tilim buk Bel Isi na Gutpela Sindaun na buk Nau Tasol long mun Novemba.
2 Planti man long nau i tingting planti long kisim ol samting bilong lukautim ol yet, olsem na ating dispela pasin bilong toktok bai kirapim ol long putim gut yau:
◼ “Planti man mi bin toktok wantaim ol long nau i save tingting planti long ol bai mekim wanem bilong kisim mani. Sampela i tingting planti long i no gat planti wok mani na pe bilong ol samting i go antap. Yumi inap kisim ol save we bilong helpim yumi long ol kain hevi olsem? [Larim man i bekim tok.] Mi save olsem Baibel i kamapim ol tok inap helpim yu long save, olsem wanem ol dispela bel hevi bai pinis. Mi laik soim yu long sampela tok bilong en.” Soim em sampela skripsa ol i kamapim insait long liklik nius Gutpela Sindaun Long Nupela Taim. [Givim wanpela nius long man bilong haus.] Nau yu ken soim em buk Bel Isi na Gutpela Sindaun, na buk Nau Tasol, na tokim em olsem dispela tupela buk i stori moa long ol gutpela tok promis liklik nius i stori long en. Yu ken stori moa long sampela tok bilong tupela buk, na tilim tupela wantaim long 50 toea na stretim rot bambai yu ken go bek na lukim em.
3 O yu ken traim long mekim tok olsem:
◼ “Long olgeta taim yumi kaunim niuspepa o harim nius, yumi harim olsem narapela hevi i kamap na i mekim yumi tingting planti. [Kolim sampela samting em nau tasol i bin kamap long nius.] Olsem wanem yumi inap karim ol kain hevi olsem? [Larim man i bekim tok.] Wanpela presiden bilong Amerika long bipo i tok olsem, Baibel i gat ol nambawan gutpela tok ol i bin raitim na ‘insait long en i gat ol tok i kamapim klia rot bilong stretim ol hevi, em ol man i no bin save long en.’ Dispela tok em i mekim i helpim yumi long tingim wanpela tok Baibel yet i bin kamapim. [Kaunim 2 Timoti 3:16, 17.] Mi laik soim yu i gat wanem as na yumi inap bilip long tok bilong Baibel.” Kamapim sampela bikpela tok bilong liklik nius I Gat Wanem As na Yu Inap Bilip Tru Long Tok Bilong Baibel. [No ken lusim tingting long givim wanpela nius long man bilong haus.] Stori long olsem wanem ol hevi i kamap long graun long nau i truim ol tok profet bilong Baibel, na kamapim sampela tok i stap long pes 161 i go 164 long buk Nau Tasol o pes 82 i go 83 long buk Bel Isi na Gutpela Sindaun. Tilim tupela buk wantaim long 50 toea, na stretim rot long go bek lukim em na stori moa long olsem wanem ol hevi i kamap long graun long nau i truim ol tok profet bilong Baibel.
4 Nambawan Tisa bilong yumi i bin stretim rot bambai ol gutpela save long laik bilong em i ken stap ples klia bambai ol man i laik kisim save ol i ken lain long en. Givim bel long tilim buk Bel Isi na Gutpela Sindaun, na buk Nau Tasol, long mun Novemba. Wanpela gutpela samting yumi inap mekim bilong helpim ol narapela, em taim yumi helpim ol long pilim tru ol gutpela tok bilong Baibel; em inap helpim ol long abrusim bagarap.—Snd 1:32, 33.