Olsem Wanem? Yu Gat Planti Wok Tumas?
1 Pol i tok, ‘oltaim yumi mas wok strong long mekim wok bilong Bikpela.’ (1 Ko 15:58) Long olgeta de yumi mas stadi, autim tok oltaim, go long ol miting, na wok strong long mekim ol wok yumi kisim insait long kongrigesen. Na tu, yumi mas helpim ol brata i gat hevi. Tru tumas, i gat planti samting yumi mas mekim, na ating sampela taim yumi pilim olsem yumi gat planti wok tumas na yumi mas painim rot na bai yumi no gat planti wok olsem.
2 Ating sampela taim i stret na i gutpela long yumi mas lusim sampela hap wok. Sampela man i ting ol i mas mekim olgeta samting ol narapela i tokim ol long mekim. Sapos yumi no bihainim gutpela tingting long dispela samting, dispela inap putim hevi long yumi, na ating bihain bikpela hevi tru inap painim yumi.
3 Bihainim Gutpela Tingting: Rot bilong bihainim gutpela tingting, i olsem: Yumi mas bihainim tok bilong Pol na “skelim gut” olgeta samting bambai yumi ken save long ol bikpela samting. (Fl 1:10) Long dispela rot bai yumi inap mekim ol bikpela samting, na sapos yumi gat taim, na yumi inap, orait, yumi ken mekim ol samting i no bikpela samting tumas. Wanpela bikpela samting yumi mas mekim, em wok bilong yumi long lukautim famili. Na tu, yumi mas mekim sampela wok bilong skin. Tasol Jisas i lainim yumi, sapos yumi tingim Kingdom pastaim, dispela bai helpim yumi long skelim wanem ol samting i bikpela samting long yumi mas mekim. Pastaim yumi mas mekim ol samting bilong truim dediket yumi bin mekim long Jehova.—Mt 5:3; 6:33.
4 Olsem na ating yumi mas lusim sampela samting yumi save mekim i no olsem samting tru yumi mas mekim, na yumi no ken wok long painim planti amamas tumas, na ating yumi mas lusim sampela samting yumi bin tokim ol narapela bai yumi mekim, em ol samting i olsem liklik samting tasol. Taim yumi stretim wok yumi mas mekim long olgeta wik, bai yumi makim hap taim bilong yumi ken stadi, na autim tok, na go long ol miting, na mekim ol narapela samting bilong helpim yumi long lotuim Jehova. Sapos i gat hap taim i stap yet, orait, yumi ken mekim ol narapela samting. Tasol yumi mas skelim gut ol dispela samting, ol inap helpim yumi long bihainim gutpela tingting Kristen na putim Kingdom i stap olsem nambawan samting o nogat.
5 Tasol maski yumi bihainim ol dispela tok, ating bai yumi pilim yet olsem yumi gat bikpela wok tumas. Sapos olsem, orait, yumi mas bihainim singaut bilong Jisas, em i tok: “Yupela ol man i save hatwok tru na i karim ol bikpela hevi, yupela olgeta kam long mi na bai mi givim malolo long yupela.” (Mt 11:28) Na tu, yumi mas wetim Jehova; long “olgeta de em i save karim ol hevi bilong yumi” na em i save strongim ol man i no gat strong. Em i tok promis, bai em i no larim wanpela samting i bagarapim stretpela man. (Sng 55:22; 68:19; Ais 40:29) Yumi ken bilip tru olsem God bai harim ol beten bilong yumi na helpim yumi long mekim yet ol wok bilong em.
6 Tru, yumi gat planti gutpela wok bilong Kingdom yumi mas mekim, tasol yumi ken amamas, long wanem, yumi save, hatwok yumi mekim long Bikpela, bai i no inap lus nating.—1 Ko 15:58.