Autim Tok Long Apinun—Yu Traim Pinis?
1 Yumi olgeta i kisim amamas taim gutpela samting i kamap long wok bilong yumi. Tasol sapos yumi no inap lukim gutpela samting i kamap, ating bai yumi les long mekim wok na yumi no amamas long en. Yumi save amamas long mekim wok i gat as bilong en—em wanpela blesing. (Skelim wantaim Saveman 3:10-13.) Na i wankain tu long wok autim tok. Yumi save pinis olsem taim yumi go long ol haus na yumi inap toktok wantaim ol man long Baibel, orait taim yumi go bek long haus bilong yumi, yumi pilim olsem yumi gat nupela strong long spirit. Yumi pilim olsem yumi bin mekim sampela gutpela wok.
2 Long sampela hap i hatwok long painim ol man long haus bilong ol. Long moningtaim, long planti hap, wanpela long olgeta tupela tupela man i no stap. Bilong painim ol dispela man, planti kongrigesen i bin stretim rot bilong autim tok long apinun, na gutpela samting i bin kamap. Ol pablisa i tok, taim ol i autim tok long apinun, ol i painim planti man na planti ol i stap isi na amamas long harim tok bilong Kingdom. Olsem wanem? Yu bin traim pasin bilong autim tok long apinun?—Skelim wantaim Mak 1:32-34.
3 Ol Elda i Stretim Rot Bilong Autim Tok Long Apinun: Long sampela hap planti pablisa i save go long ol bung bilong autim tok long apinun olsem 4 klok samting. Yumi ken tingim tu ol yangpela pablisa i lusim skul long apinun na ol pablisa i lusim ples wok. Sampela pablisa i no inap autim tok long Sarere Sande, tasol ol inap autim tok long apinun namel long wik.
4 I gat kain kain wok yu ken mekim taim yu autim tok long apinun. Yu ken go long ol haus na tilim nius o ol samting bilong tilim long mun. Apinun em i gutpela taim bilong i go long ol haus na painim ol man i no bin i stap long moningtaim o long Sarere Sande. Ating yu inap autim tok tu long rot na bungim planti man ol i lusim ples wok na wokabaut i go bek long haus bilong ol. Planti pablisa i save olsem apinun em i gutpela taim bilong mekim ol gobek.
5 Tingting Gut na Bihainim Savepasin: Long sampela hap ating i no gutpela tumas sapos yu go autim tok long apinun tru o long tudak. Na gutpela sapos yu wokabaut wantaim narapela o wantaim bikpela lain liklik long ol rot i gat lait, na yu mas skelim gut ol haus—nogut sampela lain nogut i bagarapim yu. Taim yu paitim dua, sanap long wanpela hap em man bilong haus i ken lukim yu na tokaut klia yu husat. Bihainim gutpela tingting. Taim yu save olsem famili i kaikai i stap o kain samting olsem, tokim ol yu bai kam bek narapela taim. Ating gutpela sapos yu autim tok taim san i no go daun yet; nogut yu autim tok long tudak.
6 Taim yumi mekim wok bilong God “long san na long nait,” Jehova bai blesim wok bilong yumi.—KTH 7:15.