Painim Ol Man i Gat Gutpela Bel
1 Tok Jisas i mekim long wok bilong autim tok i makim olsem bai i gat hatwok bilong en. Em i tok: “Sapos yupela i go insait long wanpela taun o wanpela ples, orait yupela i mas painimaut gut, wanem man bilong dispela ples em i gutpela na stretpela man.” (Mt. 10:11) Long nau ol manmeri i lusim liklik hap taim tasol bilong i stap long haus, olsem na long wanem rot bai yumi inap painim ol man i gat gutpela bel?
2 Skelim Teritori: Skelim teritori bilong yu. Ol manmeri i save stap long haus wanem taim stret? Long san yu inap painim ol long wanem hap? I gat wanpela de o taim we ol bai amamas long yu go lukim ol? Sapos yu senisim taim bilong yu long autim tok na bai i stret long i stap bilong ol manmeri long teritori, dispela inap helpim wok bilong yu long kamapim ol gutpela samting.—1 Ko. 9:23, 26.
3 Planti pablisa i bin painim ol man i stap long haus long apinun. Long dispela kain taim, sampela man i save stap isi na ol i redi moa long harim tok. Na tu, autim tok long ol bisnis teritori na pablik ples em ol gutpela rot bilong autim gutnius long ol man. Sampela taim, autim tok long rot bilong telefon inap kamapim gutpela samting.
4 Long wanpela mun bilong mekim bikpela wok, wanpela kongrigesen i stretim rot bilong autim tok long ol apinun long Sarere, Sande, Trinde na Fraide. Na tu, ol i stretim rot bilong autim tok long telefon na long bisnis teritori. Dispela pasin bilong autim tok i kirapim planti brata sista long amamas long autim tok, olsem na kongrigesen i bihainim yet dispela pasin.
5 Wok Strong Long Mekim Ol Gobek: Sapos long teritori bilong yu i hatwok long painim ol man long haus taim yu mekim gobek, orait long namba wan taim yu bungim man na long ol narapela taim yu go lukim em, makim wanem taim stret yu bai go bek lukim em. Na yu mas bihainim tok bilong yu. (Mt. 5:37) Sapos i stret long mekim, yu ken askim man long telefon namba bilong em. Dispela inap helpim yu long toktok gen wantaim em.
6 Taim yumi wok strong long painim ol man i gat gutpela bel na go bek lukim ol man i laik harim tok, Jehova bai blesim yumi.—Snd. 21:5.