Yu Inap Senisim Sediul Bilong Yu?

¹ Yumi ol Kristen tru i amamas long mekim wok bilong “kisim ol manmeri.” (Mt. 4:19) Olsem ol man bilong kisim pis, yumi inap mekim gut wok bilong yumi long kisim ol man sapos yumi autim tok long ol long taim we ol man i stap long haus. Long apinun, planti manmeri i save stap long haus. Planti taim ol i malolo na i no bisi tumas. Ating ol i amamas long ol man i kam lukim ol. Olsem wanem? Yu inap senisim sediul bilong yu na bai yu inap autim tok long kain taim olsem?​—⁠1 Ko. 9:⁠23.

² Autim Tok Long Apinun: Sapos yumi stretim gut rot long autim tok long apinun, dispela bai helpim yumi long autim tok long planti manmeri moa. (Snd. 21:⁠5) Ol yangpela inap autim tok bihain long skul. Sampela bratasista inap autim tok bihain long wok. Sampela buk stadi grup i ken stretim rot bilong autim tok inap wanpela aua paslain long Buk Stadi i kirap. Ating ol kongrigesen i ken stretim rot bilong mekim bung bilong autim tok long apinun. I gutpela long mekim sotpela bung bilong autim tok, long wanem, ples i save tudak hariap, na i no gat bikpela haptaim bilong autim tok.

³ Taim yu autim tok long ol haus long apinun, yu inap bungim ol manmeri em ol i no save stap long haus long ol narapela taim. Long planti hap, ol i save autim tok long rot na long ol ples i gat planti man long apinun. Na planti i ting olsem apinun em i gutpela taim bilong mekim ol gobek na kirapim ol Baibel stadi.

⁴ Skelim Gut Ol Samting: Yumi mas bihainim gutpela tingting taim yumi autim tok long apinun. Sapos yupela i stretim rot bilong mekim bung bilong autim tok long apinun, mekim sotpela bung tasol klostu long teritori yupela bai autim tok long en. Dispela bai opim rot bilong ol pablisa long autim tok taim san i stap yet. I no gutpela long autim tok long ol haus taim ples i wok long go tudak. (Fl. 4:⁠5) Toksave kwiktaim long man bilong haus long wanem as na yu kam lukim em. Sapos yu go long haus long taim we ol i mekim sampela samting, olsem ol i kaikai i stap, orait tokim ol olsem yu bai kam bek long narapela taim. Long olgeta taim yumi mas tingim gut ol man.​—⁠Mt. 7:⁠12.

⁵ Na tu, yumi mas was gut long ol samting em inap bagarapim yumi. Sapos yu lusim teritori bihain long autim tok taim ples i wok long i go tudak, i gutpela yu wokabaut wantaim narapela o wantaim bikpela lain liklik. Wokabaut long rot we planti man i wokabaut long en, nogut yu wanpela i wokabaut. Autim tok tasol long ol ples we hevi i no inap kamap, na no ken go long ol ples nogut.​—⁠Snd. 22:⁠3.

⁶ Taim yumi autim tok long apinun, dispela bai opim rot long yumi autim tok wantaim ol painia haptaim na painia oltaim. (Ro. 1:12) Olsem wanem? Yu inap senisim sediul bilong yu na yu ken autim tok long apinun?

[Askim Bilong Stadi]

1. Bilong wanem yumi mas senisim sediul bilong yumi long autim tok?

2. Wanem sampela rot yumi ken bihainim bilong autim tok long planti man moa?

3. Long wanem ol rot yu ken autim tok long teritori bilong yu long apinun?

4. Bilong wanem em i bikpela samting long skelim gut ol samting na tingim gut man taim yumi autim tok long apinun?

5. Yumi ken mekim wanem na bai yumi inap abrusim ol hevi taim yumi autim tok?

6. Wanem ol gutpela samting inap kamap taim yumi autim tok long apinun?