God i Mekim Gut Long Man i Stap Gut Long Wok
1 Hibru 11:6 i tok “God i save mekim gut tru long ol man i wok long painim em.” Wanpela rot bilong em long mekim gut long ol gutpela wokman em ol i bin ‘mekim gut ol liklik samting’ em long ‘makim ol long bosim planti samting.’ (Mt 25:23) Yumi ken tok, bilong mekim gut long ol Witnes i bin mekim gutpela wok, planti taim Jehova i givim sampela wok moa long ol.
2 Aposel Pol i bin mekim gut wok bilong em, olsem na God i mekim gut long em na em i makim em long autim tok long ol taun na ples long hap bilong Yurop na Esia Maina. (1 Ti 1:12) Maski Pol i mas mekim bikpela wok tru bilong inapim wok bilong em long autim tok, em i amamas tru long dispela gutpela wok em i bin kisim. (Ro 11:13; Kl 1:25) Em i kamapim dispela amamas bilong em na em i wok strong tru long painim kain kain rot bilong autim tok. Em i givim bel long mekim wok, na dispela i kamapim klia bilip bilong em. Pasin bilong em i kirapim yumi long tingim wok bilong yumi olsem wanpela gutpela samting.
3 Jehova i Bin Givim Wok Long Yumi: Olsem wanem yumi ken kamapim klia, yumi gat wankain tingting long dispela wok olsem Pol i bin kamapim? Yumi ken tingim kain kain rot bilong mekim bikpela wok moa long autim tok. Taim rot i op, yumi ken autim tok long kain kain taim na ples na long ol haus. Yumi go lukim ol man i no bin i stap long haus, na mekim gobek long ol man i bin amamas long harim tok, na yumi go lukim ol Baibel-stadi stret long taim yumi bin makim.
4 Pol i stori long wok autim tok bilong yumi na em i tok: ‘Yumi mas strong long autim tok.’ (2 Ti 4:2) Sapos wanpela wok i olsem bikpela wok, orait yumi mas mekim kwiktaim. Olsem wanem? Yumi save wok strong long autim tok, na putim dispela wok i stap olsem namba wan samting long i stap bilong yumi? Olsem: Yumi no laik larim wanpela samting yumi mekim bilong kisim amamas o sampela narapela samting bilong yumi yet i pasim taim bilong yumi bilong mekim wok autim tok. Yumi save olsem pinis i kam klostu tru, na yumi save tu olsem wok bilong autim tok bilong Kingdom em i nambawan bikpela wok yumi ken mekim.
5 Bilong kamapim klia olsem yumi stap gut long God, yumi mas i stap gut long em i go i go na oltaim mekim wok em i bin givim long yumi. Yumi mas mekim tru wok bilong yumi bambai Jehova i ken mekim gut tru long yumi, long wanem, yumi bin i stap gut long em.