Wok Autim Tok—Wok i Kamapim Olsem Yumi Givim Bel Tru
1 Taim yumi mekim wok autim tok, yumi bihainim tupela nambawan bikpela lo. (Mt 22:37-39) Yumi laikim tru Jehova na dispela i kirapim yumi long tokim ol narapela long ol gutpela pasin bilong em. Yumi laikim tru ol narapela na dispela i kirapim yumi long strongim ol long kisim save long laik bilong God na long ol samting em i laik mekim, na bai ol tu i ken laikim Jehova na mekim ol samting bilong kisim laip oltaim. Olsem na long rot bilong wok autim tok, yumi litimapim nem bilong Jehova na helpim ol narapela long wetim ol gutpela samting Kingdom bai kamapim. Tru tumas, wok autim tok em wanpela wok i kamapim olsem yumi givim bel tru long God na ol manmeri.
2 Dispela pasin bilong yumi long givim bel em i save kirapim yumi long toktok long olgeta kain man, long kain kain taim na ples. (1 Ko 9:21-23) Olsem: Wanpela elda Kristen i kalap long balus na em i sindaun klostu long wanpela pris Katolik. Elda i mekim sampela gutpela askim bilong pulim tingting bilong pris, na bihain em i stiaim toktok i go long Kingdom. Long taim pris i lusim balus em i kisim pinis tupela buk bilong yumi. Em nau, gutpela samting tru i bin kamap taim elda i kamapim olsem em i givim bel tru long narapela!
3 Pasin Bilong Givim Bel i Save Kirapim Yumi Long Autim Tok: Tru tumas, ol brata sista i save mekim wok painia haptaim na painia oltaim, ol i givim bel tru long God na ol narapela man. Long olgeta taim ol painia i save givim taim na strong bilong ol long helpim ol narapela long ol samting bilong spirit. Wanem samting i save kirapim ol long mekim olsem? Wanpela painia i tok: “Mi save, spirit bilong God i as bilong pasin bilong sori. Olsem na sapos mi no gat dispela pasin bai mi no i stap long tok i tru na mi no inap mekim gut wok painia. Pasin bilong sori i helpim mi long tingim gut ol narapela man na pilim ol samting mi inap mekim bilong helpim ol, na mi save, sapos mi mekim pasin sori dispela bai kirapim ol long harim gut tok.” Jisas i bin sori olsem long ol manmeri. Wanpela taim Jisas na ol disaipel, em skin bilong ol i les olgeta, ol i go long wanpela hap bilong “malolo liklik,” tasol ol manmeri i go paslain long ol. Jisas i mekim wanem? “Em i sori tru long ol,” olsem na em i no tingim skin bilong em, nogat; em i “givim planti tok long ol.”—Mk 6:30-34.
4 Maski ol man i no laik harim gutnius yumi autim, yumi pilim bikpela amamas, long wanem, yumi save pasin sori i bin kirapim yumi long wok strong long helpim ol bambai ol i ken kisim laip. Taim Krais i skelim yumi olgeta long kot long bihain, bai yumi amamas olsem yumi bin givim bel tru long helpim ol narapela taim yumi ‘mekim tru wok autim tok bilong yumi.’—2 Ti 4:5.