Gutpela Pasin Bilong Yumi Inap Helpim Wok Autim Tok
1 Nau long taim bilong ol manmeri i orait long kain kain pasin nogut, planti yangpela i mekim nabaut long laip bilong ol long rot bilong ol drak, pasin pamuk, sakim tok na bikhet, na pait na bagarapim man. Tasol pasin bilong ol yangpela long kongrigesen Kristen i narapela kain na i gutpela tru long lukim na i naispela samting tru long ai bilong Jehova. Dispela pasin bilong ol inap helpim ol narapela long i kam insait long tok i tru.—1 Pi 2:12.
2 Planti ekspiriens i kamapim klia olsem ol gutpela pasin bilong ol yangpela Kristen i bin helpim ol manmeri i bin lukim pasin bilong ol. Wanpela tisa i toktok long wanpela yangpela Witnes em wanpela sumatin bilong em na i tokim olgeta long klas olsem, God bilong dispela meri, Jehova, em i trupela God. Em i mekim dispela tok, long wanem, dispela yangpela meri i save bihainim gutpela pasin long olgeta taim. Narapela tisa i rait long Sosaiti na i tok: “Mi laik tokim yupela olsem mi amamas long ol yangpela man long lotu bilong yupela. . . . Ol yangpela bilong yupela ol i stap olsem gutpela piksa ol narapela yangpela i ken bihainim. Ol i save daun long ol man i bikpela pinis na klos bilong ol i stret. Na ol i save gut tru long Baibel! Em pasin tru bilong lotu!”
3 Narapela tisa long skul i bin amamas tru long gutpela pasin bilong wanpela yangpela Witnes i gat 7-pela krismas na em i stap long klas bilong em. Em i amamas long pasin isi na gutpela pasin bilong dispela manki, em dispela pasin i mekim na em i stap narapela kain long ol narapela manki. Em i kirap nogut long pasin bilong dispela manki long tingim tru ol bilip bilong lotu—em i no sem liklik long i stap narakain, long wanem, ol bilip bilong em i narapela. Tisa meri i save olsem dispela manki i bin lainim gut maus bilong bel, na em inap “skelim wanem ol pasin i gutpela na wanem ol pasin i nogut.” (Hi 5:14) Bihain, mama bilong dispela manki i go lukim dispela tisa, na em i kirapim Baibel-stadi wantaim em. Em i stadi i go na i kisim baptais na bihain em i kamap wanpela painia oltaim!
4 Gutpela pasin bilong wanpela Witnes i bin helpim wanpela yangpela man long skul. Dispela yangpela meri Witnes i narakain tru—em i gat gutpela pasin, em i save wok strong long skul, na oltaim em i save pasim ol klos i stret; na tu, em i no save tok gris wantaim ol yangpela man olsem ol narapela meri i mekim. Yangpela man i luksave olsem sista i larim ol lo bilong Baibel i bosim wokabaut bilong em. Em i givim sampela askim long sista long ol bilip bilong lotu bilong em na em i kirap nogut long ol samting em i kisim save long en. Em i kirap long stadi, na i no longtaim bihain em i kisim baptais, na bihain em i insait long wok painia na wok long Betel.
5 Sapos yu wanpela yangpela Kristen na yu laik bai ol gutpela pasin bilong yu i ken helpim ol narapela, yu mas was gut long olgeta pasin bilong yu. No ken larim ol pasin, o tingting, o stap bilong ol man bilong dispela graun i pulim yu na yu orait long ol pasin nogut bilong ol. Stap olsem gutpela piksa tru long ol toktok, klos na bilas samting bilong yu. No ken mekim long taim bilong autim tok na long taim bilong ol miting bilong kongrigesen tasol, nogat; long taim yu go long skul na long taim yu mekim ol samting bilong kisim amamas samting tu. (1 Ti 4:12) Bai yu kisim bikpela amamas tru taim wanpela i laik kisim save long tok i tru, long wanem, long rot bilong gutpela pasin bilong yu, ‘lait bilong yu’ i kamap klia.—Mt 5:16.