Ol Yangpela Husat i Stap Olsem Lait
1 Jisas i tokim ol disaipel bilong em: “Yupela i olsem lait bilong graun.” (Mt. 5:14, 16) Olsem wanpela taun i stap antap long maunten em lait bilong san i holim, pasin bilong ol disaipel i stap ples klia. Long nau, planti yangpela Kristen “i stap olsem ol lait namel long ol lain manmeri.”—Fl. 2:15; Mal. 3:18, NW.
2 Long Skul: Olsem wanem yu inap autim tok long skul? Sampela yangpela i kirap autim tok taim klas i toktok long ol drak, evolusen, o sik AIDS samting. Tisa i makim wanpela sista long raitim stori long pasin teroris na long rot bilong dispela stori sista i autim tok olsem Kingdom Bilong God bai helpim tru ol manmeri. Tisa i kirap nogut long stori em i bin raitim gut na dispela i opim rot long sista i ken autim tok moa.
3 Narapela rot bilong stap olsem lait em long rot bilong wokabaut bilong yu, klos yu werim, pasin bilong yu long kom gut na stretim gut skin. (1 Ko. 4:9; 1 Ti. 2:9) Taim ol sumatin na ol tisa i lukim olsem pasin bilong yu i narapela kain, dispela gutpela pasin bilong yu inap opim rot long yu ken autim ol tok i tru bilong Baibel long ol. (1 Pi. 2:12; 3:1, 2) Ating i hatwok long bihainim pasin God i laikim, tasol Jehova bai blesim yu tru. (1 Pi. 3:16, 17; 4:14) Bilong kirapim tingting bilong ol narapela long harim gutnius, yu ken ritim ol buk na nius bilong Baibel long taim bilong malolo o lusim long hap we ol narapela inap lukim.
4 Taim yu stap olsem lait long skul, dispela i strongim bilip bilong yu na i helpim yu long kisim pasin bilong amamas long yu mekim wok bilong Jehova. (Jer. 9:24) Dispela samting bai lukautim yu tu. Wanpela sista i tok, “Wanpela gutpela samting i painim mi taim mi bin autim bilip bilong mi, em ol sumatin i no traim long subim mi long mekim ol samting i no stret wantaim tok bilong Baibel.”
5 Mekim Bikpela Wok Moa: Narapela rot bilong ol yangpela i stap olsem lait em long rot bilong mekim bikpela wok moa bilong autim tok. Taim wanpela brata i pinisim haiskul, em i go sindaun long hap i sot long ol man bilong autim tok bilong Kingdom. Em i insait long wanpela liklik kongrigesen i gat wanpela elda tasol. Em i raitim pas long wanpela pren: “Mi kisim bikpela amamas tru long hia. Mi kisim nupela strong taim mipela i autim tok! Mipela i save toktok inap 20 minit long olgeta haus, long wanem, ol manmeri i laik harim olgeta tok mipela i autim long ol.” Em i tok moa: “Mi laik bai olgeta yangpela i mekim dispela kain wok na kisim wankain amamas olsem mi kisim. I no gat narapela samting i winim pasin bilong mekim wok bilong Jehova long olgeta samting yumi gat.”
6 Mipela i amamas tru long yupela yangpela i stap olsem lait long dispela graun! (1 Te. 2:20) Taim yupela i mekim wok bilong Jehova long bel, tingting, na strong olgeta bilong yupela, bai yupela i kisim ‘100 moa, winim ol samting yupela i bin i gat bipo, na bihain yupela bai i kisim laip i stap gut oltaim oltaim.’—Mk. 10:29, 30; 12:30.
[Askim Bilong Stadi]
1. Baibel i tok wanem bilong soim olsem pasin bilong ol Kristen bai stap ples klia? Olsem wanem ol dispela tok i stret long ol yangpela Kristen long nau?
2. Wanem sampela rot yu ken bihainim bilong autim tok long ol tisa na ol wanklas?
3. Yu ken mekim wanem long skul na bai yu stap olsem lait long rot bilong wokabaut bilong yu?
4. Wanem sampela gutpela samting inap painim yu taim yu autim tok long skul?
5. (a) Sampela yangpela i mekim wanem bilong mekim bikpela wok moa? (b) Yu laik winim wanem ol mak bilong spirit?
6. Yu amamas long wanem pasin bilong ol yangpela insait long kongrigesen bilong yu?