“Stap Olsem Ol Lait”

¹ Namel long ol manmeri bilong nau em ol i stap long tudak bilong spirit na ol i no bihainim stretpela pasin, i gat olsem 6 milion manmeri ol i lotuim trupela God, Jehova, ol i “stap olsem ol lait” long 234 kantri long olgeta hap bilong graun. (Fl. 2:​15) Dispela i mekim na yumi stap long ples klia. Olsem wanem yumi inap sutim dispela gutpela lait bilong tok i tru i kam long Jehova i go long ol man?​—2 Ko. 3:​18.

² Pasin Bilong Yumi: Ol man i save luksave kwik long pasin bilong yumi. (1 Pi. 2:​12) Wanpela meri i lukim olsem wanwok bilong em husat i wanpela Witnes, em i save mekim gutpela pasin na helpim ol narapela, na em i no save mekim ol tok nogut o lap long ol tok pilai nogut. Taim ol narapela i mekim ol tok nogut bilong skrapim bel bilong dispela Witnes, em i save stap isi na strong long bihainim stretpela pasin. Dispela i mekim wanem long meri i wanwok bilong em? Em i tok: “Mi kirap nogut tru long pasin bilong em na mi kirap mekim ol askim long tok bilong Baibel. Mi kirap long stadi long Tok Bilong God na bihain mi kisim baptais.” Em i tok moa: “Pasin bilong em i bin kirapim mi long skelim gut ol bilip bilong ol Witnes Bilong Jehova.”

³ Tingting bilong yumi long ol lain i gat namba, na ol pasin bilong graun, na pasin bilong yumi long mekim ol gutpela tok tasol i save mekim na ol Witnes Bilong Jehova i gat nem olsem lain bilong bihainim ol gutpela lo bilong Baibel. Ol gutpela pasin olsem inap givim biknem long Jehova na kirapim ol narapela long i kam lotuim em.

⁴ Ol Tok Yumi Mekim: Tru, ol man i lukim gutpela pasin bilong yumi, ating ol i no inap save long as na yumi narapela kain sapos yumi no tokim ol long bilip bilong yumi. Olsem wanem? Ol wanwok o wanskul bilong yu ol i save olsem yu wanpela Witnes Bilong Jehova? Taim yu stori nating wantaim ol man, yu save painim rot bilong autim tok long ol? Yu tingting strong long mekim ‘lait bilong yu i lait long ai bilong ol manmeri’ long olgeta taim rot i op?​—Mt. 5:​14-​16.

⁵ Bilong inapim wok bilong yumi bilong stap olsem lait, yumi mas daunim ol laik bilong yumi yet. Pasin bilong givim bel olgeta bai kirapim yumi long lusim ol samting i no bikpela samting na bai yumi inap mekim bikpela wok moa bilong autim tok na kamapim ol disaipel—em wok bilong helpim ol man long kisim laip.​—2 Ko. 12:15.

⁶ Long rot bilong ol pasin na tok yumi mekim, yumi ken i stap yet olsem lait. Sapos yumi mekim olsem, dispela inap kirapim ol narapela long bung wantaim yumi long givim biknem long Jehova.