Mi Laik Kirapim Wanpela Baibel-Stadi!
1 I gat gutpela as na planti bilong yumi i bin tokaut olsem yumi laikim wanpela Baibel-stadi. Wok bilong mekim ol Baibel-stadi i save helpim yumi long kamapim ol nupela disaipel. (Mt 28:19, 20) Tasol ating inap sampela mun, o sampela yia i lus nau na planti bilong yumi i no pilim yet dispela bikpela amamas bilong skulim wanpela man long tok i tru. Long mun Novemba, yumi ken mekim wanem na bai yumi kisim dispela amamas? Taim yumi mekim ol gobek, yumi ken wok strong long kirapim ol nupela Baibel-stadi.
2 Makim Wanpela o Tupela Sarere Sande: Mipela i laik kirapim olgeta long makim hap taim long dispela mun bilong wok strong long kirapim wanpela nupela Baibel-stadi. Ol wasman bilong ol Buk-Stadi Bilong Kongrigesen ol i mas makim wanem ol Sarere Sande grup i ken mekim dispela wok na stretim ol samting bambai ol brata sista i ken wok strong long mekim ol gobek.
3 Long ol bung bilong wok autim tok, bringim lista i gat nem bilong olgeta gobek bilong yu. Orait go bek lukim olgeta man i bin amamas long harim tok, o kisim buk na nius samting, o ol i bin kam long ol miting. Long olgeta dispela gobek yu mekim, tingting strong long kirapim Baibel-stadi.
4 Mekim Wanpela Soim: Long sampela bung bilong wok autim tok, kamapim wanpela soim ol i bin redim gut bilong makim pasin bilong kirapim wanpela Baibel-stadi taim yumi mekim gobek. Ating yu ken tok olsem: “Planti man i gat Baibel, tasol ol i no save Baibel inap bekim ol bikpela askim long i stap bilong yumi. [Opim buk Save long pes 3 i gat lista bilong ol tok i stap insait, na kaunim het-tok bilong sapta 3, 5, 6, 8, na 9.] Sapos yu stadi long dispela buk inap wanpela aua samting long olgeta wik, insait long sampela mun tasol, yu inap kisim save long ol bikpela tok bilong Baibel. Sapos yu laik makim wanpela bilong ol dispela het-tok yu laik kisim save long en, mi bai amamas long soim yu pasin bilong mekim stadi.” Sapos man i no laik stadi, long wanem, em i gat planti wok tumas, yu ken tokim em i gat narapela rot i no inap kisim bikpela hap taim bilong em. Soim em buklet Yumi Mas Mekim Wanem?, na tokim em inap 15-30 minit tasol long olgeta wik yu inap stadi wantaim em long wanpela hap bilong en.
5 Sapos yumi olgeta i wok wantaim bilong kirapim ol Baibel-stadi, na sapos yumi beten askim Jehova long blesim wok bilong yumi, em nau, yumi inap kirapim ol nupela Baibel-stadi! (1 Jo 5:14, 15) Sapos yu laik kirapim wanpela Baibel-stadi, ating dispela em wanpela gutpela rot bilong helpim yu long mekim olsem.