Yumi Bin Pasim Tok Long Bihainim Rot Jehova i Makim
1 Wanpela bikpela samting long ol “Bihainim Rot God i Makim” kibung em dispela bikpela tokaut i bin kamap long pinis bilong kibung. Ol i kirapim tok olsem: “Yumi . . . wanbel long tokaut olsem rot God i makim em i nambawan gutpela rot long bihainim.” Tingim sampela bikpela tokaut ol i bin kamapim long dispela tok na yumi bin tok “YES!” long en.
2 Yumi pasim tok long bel olsem yumi bai stap klin long ai bilong Jehova, na yumi no larim pasin bilong dispela graun i mekim yumi i kamap doti. Yumi bai wok yet long larim laik bilong God i stap namba wan long i stap bilong yumi. Yumi ken larim tok bilong Baibel i soim rot long yumi, na bai yumi i no paul na i go long han sut o han kais. Olsem bai yumi kamapim klia olsem rot God i makim i gutpela moa na i winim rot ol man bilong graun i bihainim.
3 Ol manmeri bilong graun i no save bihainim rot God i makim na planti hevi i painim ol. (Jer 10:23) Olsem na yumi mas kisim skul yet long Nambawan Tisa bilong yumi, em Jehova, em i save ‘tokim yumi long rot yumi mas bihainim.’ (Ais 30:21) Rot Jehova i makim bilong bihainim, olsem Baibel i tokim yumi long en, em i nambawan tru. Bilong wokabaut yet long dispela rot, em i bikpela samting long yumi mas bihainim olgeta tok Jehova i skulim yumi long en.
4 Skul Bilong Jehova i Nambawan: Jehova i skulim yumi long as tru bilong i stap bilong yumi na olsem wanem yumi ken mekim gutpela wok long en. Em i save skulim yumi long olsem wanem yumi ken mekim tingting, na pasin bilong yumi i kamap gutpela moa, na olsem wanem yumi inap kamap strong moa long ol samting bilong spirit. Em i skulim yumi long olsem wanem yumi ken i stap bel isi wantaim ol brata bilong yumi, famili bilong yumi, na ol narapela man. Em i skulim yumi long rot bilong buk bilong em, em Baibel, na long rot bilong oganaisesen bilong em.
5 Ol miting bilong kongrigesen i bikpela samting bilong skulim yumi. Taim yumi go oltaim long 5-pela miting na bekim tok long olgeta miting, yumi lain long planti samting olsem ol wokman bilong autim gutnius na yumi kisim gutpela skul bilong bihainim pasin Kristen. (2 Ti 3:16, 17) Nambawan Tisa bilong yumi i save givim sampela skul moa long yumi long rot bilong ol kibung. Yumi mas putim mak olsem yumi no ken lusim wanpela miting o wanpela de bilong kibung. Sik o wanpela bikpela hevi em tasol inap pasim yumi.
6 Yumi mas wok strong yet long bihainim rot God i makim, dispela i litimapim nem bilong Jehova na i helpim yumi inap oltaim oltaim!—Ais 48:17.