Givim Bel Tru Long Autim Gutnius
1 “Mi laikim tumas long lukim yupela, . . . bel bilong mi i kirap long autim gutnius long yupela ol manmeri bilong Rom tu.” Long kirap bilong pas em i raitim long ol brata long Rom, aposel Pol i kamapim tingting bilong em olsem. Bilong wanem Pol i givim bel tru long i go lukim ol? Em i tok: “Mi i bin helpim ol manmeri bilong ol arapela lain long kamap Kristen, olsem na mi laik helpim yupela tu. . . . Mi no save sem long autim gutnius, long wanem, strong bilong God i stap long gutnius, em strong bilong kisim bek olgeta man i bilip.”—Ro 1:11-16.
2 Taim Pol i toktok wantaim ol elda long Efesus, em i kamapim wankain pasin olsem em i givim bel tru long mekim wok. Em i tokim ol: “Long namba wan taim mi kamap long Esia, . . . mi no surik long autim olkain gutpela tok . . . long ol bung bilong ol manmeri na long olgeta haus bilong yupela tu, mi bin skulim yupela. . . . Oltaim mi bin autim tok strong long ol Juda na long ol Grik.” (Ap 20:18-21) Long olgeta teritori em i mas autim tok long en, em i gat bikpela tingting long autim gutnius bilong helpim ol man long kisim laip na kamapim ol kaikai bilong Kingdom. Yumi ken bihainim gutpela pasin bilong em!
3 Ating yumi ken askim yumi yet olsem: ‘Olsem wanem? Mi givim bel tru long autim gutnius long hap mi stap long en olsem Pol i bin mekim? Mi tingim wok autim tok i olsem wanpela wok mi mas mekim, o mi givim bel tru long autim gutnius long planti man moa? Mi beten na skelim gut ol samting mi inap mekim? Mi traim pinis long bihainim olgeta rot bilong autim tok long hap bilong mi, olsem long ol haus, long rot, long ol ples bisnis, long rot bilong telefon, na long kain kain taim na ples?’
4 Givim Bel Tru Long Autim Tok Long Epril: Mun Epril em gutpela mun tru bilong yumi wan wan i ken mekim bikpela wok autim tok. Planti moa inap mekim wok painia haptaim, long wanem, Sosaiti i daunim mak bilong aua ol i mas winim. Ating yu inap mekim wok painia haptaim long mun Epril na Me. O ating yu inap mekim wok painia oltaim, long wanem, nau mak bilong aua ol painia i mas winim i go daun pinis. Sapos yu wanpela pablisa bilong kongrigesen, inap yu lusim sampela hap taim moa bilong autim tok long dispela mun na narapela mun long wok wantaim ol pablisa i mekim wok painia? Sapos yu mekim olsem Jehova bai amamas long dispela!
5 Olsem Pol, ol pablisa i autim tok bilong Kingdom ol i mas givim bel tru long mekim bikpela wok moa long autim tok. Taim yumi mekim wok inap tru long skel bilong yumi, dispela bai helpim yumi long i stap amamas tru. Pol i bin amamas olsem taim em i mekim wok bilong God. I gutpela yumi bihainim gutpela pasin bilong em.—Ro 11:13; 1 Ko 4:16.