Skulim Ol Narapela Long Helpim Ol Yet
1 Jehova i laik bai olgeta man i kisim ol samting i helpim ol. (Ais 48:17) Em i save long ol samting em inap helpim yumi long i stap amamas tru. Em i laik bai yumi bihainim ol lo bilong em na abrusim ol hevi na stap amamas. Taim yumi bihainim ol lo bilong God yumi helpim yumi yet. (Sng 34:8) Olsem wanem yumi ken skulim ol narapela long mekim wankain pasin?
2 Ol Man i Laikim Wanem Samting? Long hap yu stap long en, ol man i save tingting long wanem ol samting? Ol i save tingting long sindaun bilong famili bilong ol, long strongim marit bilong ol, long i stap bilong ol pikinini bilong ol long bihain, na kain samting olsem, a? Taim ol i gat hevi, ol i go we bilong kisim helpim? Ating ol i tingim save bilong ol yet, o sampela buk samting i kamapim olsem wanem ol inap helpim ol yet, o ol i laik ol narapela i soim rot long ol. Taim ol i mekim olsem planti man i tingting planti, long wanem, ol dispela tok bilong helpim ol i no wok gut na i narapela narapela kain. Yumi mas helpim ol long bilip tru olsem rot Tok Bilong God i stiaim yumi long en em i gutpela tru. (Sng 119:98) Yumi ken mekim olsem taim yumi helpim ol long save sapos ol i stadi long Baibel na bihainim ol tok bilong en ol inap stretim gut sindaun bilong ol long nau.—2 Ti 3:16, 17.
3 Mekim Sindaun Bilong Famili i Kamap Gutpela: Planti manmeri i no save ol tok em spirit holi i bin kamapim long Efesus 5:22–6:4, em i gutpela tru long helpim ol manmeri long stretim ol hevi bilong famili. Dispela samting i bin kamap long tupela marit, em ol i bin marit inap 10-pela yia pinis na ol i tingting olsem ol i mas bruk na lusim narapela. Tasol meri i kirap stadi long Baibel, na ol i skulim em long ol lo bilong Baibel long ol samting bilong marit. I no longtaim na man bilong em i lukim pasin bilong meri i wok long senis taim em i bihainim ol lo bilong Baibel, na em tu i kirap stadi. Bihain em i tok: “Nau mipela i painim as bilong i stap amamas tru insait long famili.”
4 As Tru Bilong i Stap Bilong Ol: Taim wanpela yangpela man i save kisim drak i painim ol Witnes bambai ol i ken helpim em, ol i skulim em olsem Jehova i tingim em. Em i tok: ‘Mi kisim save olsem God em i gat wanpela laik long ol man, na em i givim laip i stap oltaim long ol manmeri em i belgut long ol. Dispela save i mekim bel bilong mi i amamas tru. Nau mi no gat sik, na mi stap bel isi, na mi stap klostu long God.’
5 Yumi olgeta inap kisim ol gutpela samting long ol tok bilong helpim yumi i stap long Baibel. Taim yumi mekim wok long en bilong soim rot long yumi, yumi kamapim klia olsem rot God i makim em i winim tru rot ol man i makim. (Sng 116:12) Em gutpela samting long autim dispela tok long ol narapela na skulim ol long helpim ol yet. Taim yumi mekim olsem, yumi bai lukim planti gutpela samting i kamap.