Yu Save Lukluk Long Skin Tasol?
1 Taim yumi autim tok, ating yumi surik long autim gutnius long sampela man, long wanem, yumi kirap nogut taim yumi lukim ol long namba wan taim. Olsem: Sapos wanpela man i luk olsem man nogut tru, oltaim em i lukluk strong long yu taim yu save go lukim wanpela gobek i stap klostu long em, orait, bai yu mekim wanem? Dispela samting i bin painim wanpela sista painia na em i go stret long dispela man na toktok wantaim man. Em i no mekim gutpela pasin taim em i tok gude long sista. Tasol em i putim yau long tok bilong Baibel na em i amamas long stadi. Maski dispela man i luk olsem man nogut, sista i no skelim em long dispela, olsem na rot i op long dispela man na meri bilong em i kisim save long tok i tru.
2 Pastaim narapela sista i pret long lukim wanpela yangpela man i gat longpela gras, tasol sista i save autim tok liklik long em taim em i kam long stua sista i wok long en. Wok bilong em i karim gutpela kaikai, na nau dispela yangpela man em i wanpela Witnes i baptais pinis. Wanem samting bai helpim yumi na yumi no kisim kwik tingting olsem dispela kain man i no inap harim tok?
3 Bihainim Pasin Bilong Jisas: Jisas i save em bai givim laip bilong em bilong helpim olgeta man. Olsem na em i no sakim ol man em skin bilong ol i luk nogut. Em i save maski ol man i gat nem nogut, ating ol inap senisim pasin bilong ol sapos yumi helpim gut ol na kirapim ol long mekim olsem. (Mt 9:9-13) Jisas i wok strong long helpim ol maniman na ol rabisman wantaim. (Mt 11:5; Mk 10:17-22) Yumi no ken lukluk long skin na klos bilong ol man yumi bungim ol taim yumi autim tok na skelim ol long dispela, nogat; nogut yumi pasim rot bilong yumi long ting olsem ol i gat gutpela bel. (Mt 7:1; Jo 7:24) Wanem samting i ken helpim yumi long bihainim gutpela pasin bilong Jisas?
4 Taim yumi stadi long Baibel, yumi kisim save olsem Tok Bilong God i gat strong bilong senisim ol tingting, pasin na wokaubaut bilong ol man. (Ef 4:22-24; Hi 4:12) Olsem na yumi mas i gat stretpela tingting long ol man na larim Jehova i skelim ol, em Man i save lukim bel bilong ol man.—1 Sml 16:7; Ap 10:34, 35.
5 Wok bilong yumi long autim gutnius long olgeta kain man, maski ol i luk olsem wanem, em i helpim bikpela wok bilong bungim kaikai long dispela taim bilong las de.—1 Ti 2:3, 4.