Askim

◼ Em wok bilong husat long klinim Haus Kingdom?

Sapos Haus Kingdom i klin na i gutpela long ai bilong ol man, dispela bai litimapim ol tok yumi save autim. (Skelim wantaim 1 Pita 2:​12.) Olgeta samting long Haus Kingdom i mas i stap stret na olgeta i ken insait long dispela wok bilong lukautim Haus Kingdom. Yumi no ken ting sampela tasol i ken mekim dispela wok. Ol brata i save makim ol grup bilong Buk-Stadi long klinim Haus Kingdom, na brata i lukautim Buk-Stadi o helpim bilong em i save go pas long mekim dispela wok. Long ol Haus Kingdom em tupela o tripela kongrigesen i save bung, ol elda bai wokim sedyul na olgeta dispela kongrigesen i ken insait long wok bilong lukautim Haus Kingdom.

Olsem wanem yumi ken mekim gut dispela wok? Wokim sedyul bilong klinim Haus Kingdom long olgeta taim. I mas i gat marasin na brum samting bilong mekim wok long en. Wokim lista bilong ol wok na putim long notis-bot bambai ol brata sista i ken lukim na save long ol wok ol i mas mekim. Ating yupela i ken wokim tupela lista, wanpela em lista bilong ol wok olsem brumim plua tasol na rausim ol das samting bihain long olgeta wan wan miting, na narapela em lista bilong klinim gut olgeta samting, olsem mopim plua na klinim ol windo na kain ol bikpela wok olsem long olgeta wik. Brata i lukautim Buk-Stadi em i mas makim wanpela de na taim i stret long olgeta long grup i ken bung na klinim gut olgeta samting long Haus Kingdom. Katim gras na stretim ol plaua samting long olgeta taim. No ken tromoi pipia long ples bilong putim ol ka na long rot bilong wokabaut. Long olgeta wan wan yia, kongrigesen i mas klinim na stretim gut olgeta samting. Ating yupela i ken mekim olsem paslain long taim bilong Memorial. Olsem: Klinim ol windo, banis bilong Haus Kingdom, ol sia, ol laplap bilong pasim windo samting, na stretim gut plua sapos i gat wok long mekim.

Yumi olgeta i ken mekim sampela samting na bai i no gat planti wok bilong klinim Haus Kingdom. Olsem: Yumi no ken kaikai pike na tromoi nabaut long plua o tromoi pipia long insait o ausait long Haus Kingdom. Taim yumi yusim pinis toilet, yumi mas klinim gut bambai ol narapela i ken yusim. Yumi mas was gut na bai yumi no ken bagarapim ol samting o brukim ol sia samting. Sapos yumi lukim plua i bagarap, sia i bruk, paip wara samting i bagarap, lait i no wok, na ol kain samting olsem, yumi mas toksave hariap long brata i lukautim wok bilong stretim Haus Kingdom.

Yumi olgeta i mas i gat laik long insait long wok bilong klinim Haus Kingdom. Dispela bai mekim na haus bilong lotuim God i kamap wanpela naispela hap tru bilong bung long en na i makim yumi olsem wanpela lain i stap klin na litimapim nem bilong God Jehova.​​—⁠1 Pi 1:​16.