Yumi Autim Gutnius
1 Yumi gat gutpela wok tru long “autim gutnius bilong ol gutpela samting.” (Ro 10:15) Yumi gat gutpela tok bilong givim nupela strong long ol manmeri em ol i karim ol bikpela hevi na ol i stap nogut. Olsem wanem yumi ken helpim ol long save olsem tok yumi autim em i “gutpela tok bilong samting i gutpela moa?”—Ais 52:7.
2 Redim Gutpela Tok: Sapos yumi stori long ol gutpela samting taim yumi autim tok, dispela bai mekim gut bel bilong ol man. Olsem na taim yumi redim ol tok yumi bai autim, na skelim ol tok bilong ol buk na nius samting yumi bai tilim, yumi mas stori long ol gutpela samting. Wok bilong yumi bai karim gutpela kaikai taim yumi bilip na givim bel long tokim ol narapela long ol samting yumi wetim em Baibel i as bilong en.—Snd 25:11.
3 Yumi pilim tru hevi bilong ol man taim ol i tokim yumi long ol samting ol bikpela hevi bilong graun i mekim long bel bilong ol, tasol yumi mas tokim ol long rot tru bilong stretim ol hevi bilong ol man—em Kingdom bilong God. Na maski yumi stori wantaim ol man long de bilong Jehova long “mekim save long ol birua” bilong em, yumi laik tokim ol olsem dispela samting em i wanpela “gutpela tok” long ol man i gat pasin daun. (Ais 61:1, 2) Yumi ken helpim ol man long bilip olsem olgeta samting Jehova i mekim em bai kamapim gutpela samting na i helpim yumi long i stap amamas tru.
4 Autim Tok i Tru Wantaim Amamas: Taim ol man i lukim yumi amamas na nek bilong yumi i kamapim olsem yumi bilip tru long tok yumi autim, ating ol bai harim tok. Sapos pasin bilong yumi i kamapim olsem yumi ting ol gutpela samting bai kamap tru, ol bai save olsem yumi ‘wetim Bikpela i mekim gut long yumi.’ (Ro 12:12) Olsem na ating bai ol i gat laik long harim gutnius. Tru tumas, i gat gutpela as na yumi mas i gat gutpela tingting na pasin bilong amamas taim yumi insait long olgeta hap wok bilong wok autim tok.
5 Wok yumi mekim olsem wokman bilong autim gutnius, i no bilong givim toksave tasol long ol man, nogat. Wok yumi mekim i save helpim ol man long kisim gutpela sindaun long nau na long bihain tu. (1 Ti 4:8) Taim yumi go toktok wantaim wan wan man, tok yumi autim bai kamapim klia pasin bilong yumi long tingting gut long ol samting, na dispela bai helpim ol manmeri long harim tok. Yumi mas was gut long tok yumi autim na long pasin bilong yumi long autim tok, na long dispela rot yumi ken kirapim ol man i gat gutpela bel long harim dispela gutnius yumi autim!