Bihainim Pasin Bilong Jehova, Em ‘God Bilong Amamas’
1 Jehova i laik tru bai ol manmeri i stap amamas. Tok bilong em i kirapim yumi long wet long ol gutpela samting em bai mekim bilong helpim ol manmeri. (Ais. 65:21-25) Ol narapela i mas lukim olsem yumi amamas long autim long ol ‘dispela gutnius bilong God i as bilong pasin tru bilong amamas.’ (1 Ti. 1:11) Pasin bilong yumi long autim tok bilong Kingdom i mas soim olsem yumi laikim tok i tru na yumi tingim tru ol man yumi toktok wantaim ol.—Ro. 1:14-16.
2 Tru, ating sampela taim i hatwok long holimpas pasin bilong amamas. Long sampela teritori i no gat planti man i laik harim tok bilong Kingdom. Ating sampela taim yumi yet i karim ol hevi long sindaun bilong yumi. Bilong holimpas pasin bilong amamas, em i gutpela sapos yumi tingim olsem em i bikpela samting long ol manmeri long teritori bilong yumi i mas harim na kliagut long gutnius bilong Kingdom yumi save autim. (Ro. 10:13, 14, 17) Pasin bilong tingim tingim dispela samting bai helpim yumi long amamas yet long tokim ol man long ol samting Jehova i mekim bilong kisim bek ol.
3 Tingting Long Ol Gutpela Samting: Yumi mas tingim tu ol tok yumi mekim. Ating long kirap bilong tok yumi stori long wanpela hevi o long samting niuspepa i kamapim na ol man i tingting long en, tasol no ken stori longpela taim tumas long ol hevi. Yumi gat wok long autim “gutpela tok.” (Ais. 52:7; Ro. 10:15) As bilong dispela gutnius em tok promis bilong God long gutpela taim bai kamap bihain. (2 Pi. 3:13) Tingim dispela na soim ol skripsa long Baibel bilong “pinisim bel hevi bilong ol man i stap wantaim bikpela wari.” (Ais. 61:1, 2) Dispela bai helpim yumi olgeta wan wan long tingting long ol gutpela samting na holimpas pasin bilong amamas.
4 Ol manmeri bai luksave long pasin bilong yumi long amamas taim yumi mekim wok autim tok. Olsem na gutpela sapos oltaim yumi bihainim pasin bilong Jehova, em ‘God bilong amamas,’ taim yumi autim gutnius bilong Kingdom long ol manmeri long teritori bilong yumi.