Yu Pilim Gutpela Pasin Sori Bilong Krais?
1 Taim aposel Jon i tingim i stap bilong Bikman bilong em, em i tok: “Em i laikim tumas ol manmeri bilong en i stap long dispela graun, na em i laikim ol moa yet i go inap long taim em i dai.” (Jo 13:1) Long taim bilong Memorial long dispela yia, bai yumi tingim bikpela pasin sori Krais i bin kamapim. Bilong kamapim olsem yumi pilim tru dispela pasin sori bilong Krais, yumi bilip long ofa bilong em, na givim bel long wok autim tok, na olsem Jisas, yumi sanap strong na karim ol hevi i go “inap long las de.”—Mt 24:13; 28:19, 20; Jo 3:16.
2 Pilim Pasin Sori Bilong Krais: Long laspela wik bilong em long stap long graun, Jisas i bin mekim bikpela wok. (Mt 21:23; 23:1; 24:3) Yumi save bihainim pasin bilong Krais, olsem na pasin bilong laikim ol narapela i save kirapim yumi long “taitim bun tru” long mekim wok bilong Jehova. (Lu 13:24) Ol brata i bin stretim rot bilong wokim planti bung bilong wok autim tok long Epril. Olsem wanem? Yu inap go long ol dispela bung na lusim sampela hap taim moa long wok autim tok?
3 Long dispela yia, Kaikai Bilong Bikpela bai kamap long apinun long Trinde, Epril 19. Hamas manmeri bai i kam long dispela bikpela bung? Sapos yumi wok strong long singautim ol man, ating planti bai kam. Olsem wanem? Yu bin wokim lista bilong ol man yu tingting long singautim—olsem ol Baibel-stadi na sampela narapela man i gat laik long harim tok, ol wanblut, ol man yu wok bisnis wantaim ol, na ol wanskul? Yu bin go lukim ol o ringim ol na singautim ol long kam long Memorial? Bai yu tokim ol gen long Memorial sampela de paslain long en? Yu mas helpim ol bambai ol i ken kam long Memorial? Ol elda bai singautim tu ol pablisa i no mekim moa wok autim tok. Bai yumi mekim Memorial long wanpela nait namel long wik, tasol dispela i no makim olsem em i no bikpela samting tumas long yumi olgeta i kam.
4 Yumi Mas Redi: Em i bikpela samting long yumi mas redi na kisim stretpela tingting taim yumi kam long Memorial. Pol i tokim ol wanbilip bilong em long tingim olsem dispela bung em i bikpela samting tru. (1 Ko 11:20-26) Yupela i ken ritim sapta 13 i go 17 bilong Gutnius Jon i Raitim long taim yupela i mekim famili-stadi, na olgeta wan wan long famili i ken stori long ofa bilong Jisas i mekim wanem long em. Na yumi no ken lusim tingting long ritim tu hap bilong Baibel ol i makim bilong ritim long wik bilong Memorial!
5 Yumi laikim tumas Jisas, na yumi no kamapim dispela long Epril 19 tasol. Yumi laik mekim olsem inap oltaim oltaim! Memorial bilong dispela yia bai strongim yumi long mekim olsem.