Epril—Taim Bilong Wok Strong Long Mekim Gutpela Wok!
1 Taim bikpela win i wok long i go klostu long wanpela hap i gat planti man, wok bilong tok lukaut long dispela samting em i bikpela samting tru. Taim bikpela win i kam klostu moa, ol tok lukaut i mas kamap strong moa. Bilong wanem? Long wanem, ol man inap i dai! Ating sampela man i no bin harim ol tok lukaut i bin kamap pastaim. Ating sampela ol i bin harim tasol ol i no kirap mekim wanpela samting. Dispela i wankain long tok lukaut God i bin tokim yumi long autim long ol man paslain long stretpela belhat bilong God bai bagarapim olgeta samting bilong dispela graun nogut. (Snd 10:25) Laip oltaim bilong planti bilion manmeri inap lus! Yumi mas mekim dispela tok lukaut. Yumi mas “wok strong long mekim olgeta kain gutpela pasin.”—Taitus 2:11-14.
2 Inap planti yia bel bilong lain bilong Jehova i bin kirapim ol long givim bel long mekim bikpela wok moa long autim tok long taim bilong Memorial. Long dispela yia mun Epril i gat faipela Sarere Sande. Yu tingting long mekim wanem samting long dispela mun? Yu bin raitim wanem ol tok long kalenda bilong yu bilong mun Epril 2000? Tingting long insait wantaim lain bilong Jehova long wok strong long mekim gutpela wok long dispela mun bilong mekim bikpela wok bilong spirit.
3 Yumi Laik Kamapim Wanem Samting: Nambawan bikpela de bilong yia 2000 i kamap long dispela mun. Em i Epril 19, de bilong tingim i dai bilong Jisas. Yumi laik wok strong long singautim planti manmeri long i kam long Memorial. Olsem yumi bin stori long mun i go pinis, wokim wanpela lista bilong olgeta manmeri yu ting ol inap kam long Memorial na skelim gut dispela lista, nogut yu lusim tingting long wanpela. Yumi laik singautim ol pablisa i no autim tok moa, na ol Baibel-stadi, ol gobek, ol man i bin stadi long bipo, ol wanwok, ol wanskul, ol man i stap klostu long yumi, ol wanblut, na ol narapela man yumi save long ol. Olsem wanem? Ol man i gat laik long kam ol i gat rot long mekim olsem? Sapos nogat, yu inap helpim ol? Long nait bilong Memorial yumi olgeta i gat gutpela wok long tok amamas long ol man i kam bung. Bihain long Memorial, yumi ken go lukim ol dispela man i gat laik long kisim sampela save moa na helpim ol long ol samting bilong spirit.
4 Taim yumi “wok strong long mekim olgeta kain gutpela pasin” long ol de paslain na bihain long Memorial, dispela i soim Jehova olsem yumi amamas tru long ol samting em i bin mekim bilong helpim yumi. Mak yumi laik winim em i olsem: Yumi laik wok strong moa long mekim wok autim tok. Sapos yu mekim wok painia haptaim, yu mas wok strong long winim 50 aua o moa long wok autim tok. (Mt 5:37) Bihainim gut sedyul yu bin wokim long kirap bilong mun. (Sav 3:1; 1 Ko 14:40) Yumi ol narapela inap helpim ol painia long rot bilong mekim sampela tok bilong strongim ol na wok wantaim ol long autim tok. (Skelim wantaim 2 King 10:15, 16.) Sapos yumi givim bel long wok strong long Epril, bai yumi inap kisim bikpela amamas na gutpela samting long Jehova. (Mal 3:10) Dispela samting inap kirapim yumi long mekim wok painia haptaim long olgeta taim o long mekim wok painia oltaim. Gutpela sapos bikpela wok bilong spirit yumi mekim long mun Epril i strongim yumi long autim tok long olgeta taim long ol mun i kamap bihain.
5 Yumi save, long dispela mun planti tausen bilong lain bilong Jehova bai ol i kirapim sampela Baibel-stadi moa. Olsem wanem? Yu gat laik long kirapim wanpela Baibel-stadi? Beten askim God long helpim yu long painim wanpela stadi, na mekim ol samting i stret wantaim dispela beten. Yu ken save olsem Jehova bai amamas taim yu askim em long pasin daun long helpim yu long painim wanpela man i gat gutpela bel bilong yu ken lainim em.—1 Jon 3:22.
6 Mipela i kamapim hia wanpela rot bilong kirapim tok wantaim ol man em ol brata i traim pinis na i save wok gut. Bilong kirapim tok mekim askim olsem: “Taim yu lukim planti yangpela man i insait long pasin raskol long taim bilong yumi, yu ting wok bilong ol spirit nogut i as bilong dispela? O ol papamama i no stretim gut ol pikinini na dispela i as bilong en?” Larim man i bekim. Sapos man i tok “wok bilong ol spirit nogut” i as bilong dispela samting, orait ritim Kamapim Tok Hait 12:9, 12, na stori gut long wok Satan i save mekim bilong kirapim ol hevi hia long graun. Nau opim buklet Yumi Mas Mekim Wanem? long stadi 4, na askim man olsem sampela taim em i bin tingting long Satan i bin kamap olsem wanem? Bihain ritim paragraf wan na tu na stori long en. Sapos man i tok “ol papamama i no stretim gut ol pikinini,” olsem na planti pasin nogut i kamap long ples bilong ol man, orait ritim 2 Timoti 3:1-3 na stori long ol pasin nogut bilong ol man i save kamapim dispela hevi. Nau opim buklet Yumi Mas Mekim Wanem? long stadi 8, na ritim paragraf 5, na stori moa wantaim dispela man. Sapos yu inap pasim tok long go bek lukim dispela man, ating rot i op long yu ken kirap stadi long Baibel wantaim em. Bihain taim yu go lukim em gen, yu ken askim em olsem: Yu save long sampela narapela ol i gat laik long kisim save long ol samting yu wok long lainim?
7 Narapela rot bilong “wok strong long mekim olgeta kain gutpela pasin” long Epril em olsem: Autim tok long kain kain rot. Olsem wanem? Sampela taim yu bin tingting long autim tok long wanpela pak o long hap bilong putim ol ka? O long hap bilong kisim PMV o long ples balus? O yu laik traim autim tok long telefon, o long rot, o long ol bisnis teritori? No ken tingting tasol long mekim, gutpela sapos yu traim tru long mekim long dispela mun, a? Jehova bai helpim yu long kisim strong bilong mekim dispela wok. (Ap 4:31; 1 Te 2:2b) Ating yu inap pasim tok long wok wantaim wanpela painia o pablisa i gat save long autim tok long ol dispela rot.
8 Ol brata i gat laik long mekim bikpela wok moa long autim tok ol bai autim tok long kain kain taim na ples. Planti taim i no hat wok long kirap toktok wantaim man sapos yumi mekim pasin pren long em. Kirap toktok long wanpela samting planti man ol i tingting long en, o ating yu inap mekim wok long ol tok i stap long paragraf 6. Traim long mekim gutpela wok long ol liklik hap taim i save lus nating. Yumi no save tromoi ol 5 toea, o 10 toea, o 20 toea, long wanem, ol i no wanpela kina olgeta, a? Olsem tasol, em i gutpela sapos yumi mekim wok long olgeta 5-pela minit, o 10-pela minit, o 20 minit bilong autim tok long kain kain taim na ples.
9 Tingim Ol Samting i Bin Kamap: Tingim gen ol strongpela tok em pilai bilong Baibel i bin kamapim long “Tok Profet Bilong God” Kibung Distrik long yia i go pinis. Het tok bilong en i olsem: Amamas Long Ol Gutpela Samting Bilong Spirit Yumi Bin Kisim, na dispela pilai i bin kirapim yumi long skelim pasin bilong Jekop wantaim pasin bilong Iso. Iso i bin tok olsem em i save tingting long ol samting bilong spirit olsem Jekop i save mekim, tasol pasin bilong em i no kamapim dispela samting. (Stt 25:29-34) Dispela em i wanpela strongpela tok lukaut long yumi! Wankain olsem Jekop, yumi mas redi long wok strong na pait bilong kisim blesing bilong Jehova. (Stt 32:24-29) Gutpela sapos long Epril na long olgeta narapela mun bihain long en yumi kirapim gen amamas bilong yumi long mekim wok, na tingim ol gutpela samting bilong spirit yumi bin kisim, a?
10 “De bilong [Jehova] i mekim kot bilong en, em i klostu nau na dispela De bai i kamap kwiktaim tru.” (Sef 1:14) Ol manmeri i mas harim gutnius bilong Kingdom. Laip bilong ol manmeri inap lus! Gutpela sapos long dispela mun lain bilong Jehova i kisim ol gutpela blesing taim ol i wanbel long wok strong long mekim gutpela wok.
[Blok long pes 4]
Ol Samting Bilong Tingim Long Memorial
Memorial long dispela yia bai kamap long Trinde, Epril 19. Ol elda i mas tingim ol dispela samting:
◼ Skelim gut taim yupela i makim bilong Memorial, bambai yupela i tilim bret na wain bihain long taim san i go daun pinis.
◼ Toksave long olgeta brata sista, na brata bilong mekim tok bilong Memorial tu, long taim na ples stret bilong mekim bung.
◼ Yupela i mas wokim bret na baim wain i stret bilong mekim Memorial.—Lukim Wastaua, Mas 1, 1985, p. 20.
◼ Redim ol plet, ol glas, na wanpela gutpela tebol na laplap bilong karamapim tebol. Paslain long bung i kirap, kisim ol dispela samting i kam long Haus Kingdom na putim gut long ples bilong ol.
◼ Klinim gut Haus Kingdom o narapela ples bilong mekim bung long en, paslain long taim bilong mekim Memorial.
◼ Paslain long Memorial, makim ol brata bilong mekim wok atendan na ol brata bilong tilim bret na wain. Toksave long ol long pasin bilong mekim Memorial na wan wan wok ol i mas mekim.
◼ Sapos 2-pela o 3-pela kongrigesen i mekim Memorial long wanpela Haus Kingdom tasol, orait ol i mas wok gut wantaim long stretim ol samting bambai ol man i no pas pas long rot, na dua, na ples bilong putim ol ka.