“Olsem Wanem? Bai Mi Go?”
1 Planti wokboi bilong Jehova i dediket pinis ol i bihainim tok bilong Jisas long “go mekim olgeta lain manmeri i kamap disaipel,” na ol i go mekim wok long hap i sot long ol wokman. (Mt 28:19) Ol i bihainim pasin bilong Pol, em i bin harim dispela singaut: “Yu mas brukim solwara na yu kam long Masedonia na helpim mipela.” (Ap 16:9) Olsem wanem yu ken mekim olsem?
2 Skelim Gut Olgeta Samting Pastaim: Olsem wanem? I gat sampela teritori long kongrigesen bilong yupela em yupela i no save autim tok planti taim long en? Sapos i gat, orait yu ken wok strong long autim tok long ol dispela hap. Taim yu no go yet long narapela hap, toktok wantaim ol elda bilong yu na bai yu ken save ol i ting yu redi tru long i go mekim wok long dispela hap o nogat. Yu ken askim tu wasman sekit long wanpela kongrigesen i stap klostu em yu inap go na mekim bikpela wok bilong autim tok long en. Tasol taim yu skelim pinis olgeta samting, ating yu ken tingting long helpim wok autim tok long narapela hap bilong kantri. Sapos dispela em laik bilong yu, yu na ol lain elda i ken raitim pas long brens-ofis bilong toksave long dispela ples yu laik i go na helpim wok long en, na stori long ol wok bilong spirit yu save mekim. Ating em i gutpela long yu go lukim dispela hap paslain long yu go na stap olgeta long dispela hap.
3 Ol Samting Yumi Mas Mekim Long Nau: Yumi amamas tru, long wanem, long mun Epril yumi gat 404 painia haptaim, winim olgeta taim bipo. Olsem wanem? Sampela bilong ol dispela brata sista inap insait long mekim wok painia oltaim? Mipela i laik kirapim planti brata long tingting long insait long dispela wok. Long ol kongrigesen long olgeta hap bilong kantri, yumi sot long ol strongpela brata em ol inap i go pas long wok autim tok na long helpim dispela wok i go bikpela. Ating bihain, sampela bilong ol dispela brata inap i go—maski ol i go bilong stap sotpela taim—long ol ples ol pablisa na ol man i gat laik long harim tok ol i mas kisim helpim bilong ol i ken kamap strong long ol samting bilong spirit. Mipela i bin lukim olsem ol gutpela samting i bin kamap taim sampela brata i mekim wok painia oltaim ol i go long sampela liklik grup bilong helpim ol. Tru, bilong man i ken i go long narapela hap em i mas skelim gut, em inap lukautim em yet long ol samting bilong skin o nogat. Pastaim em i mas stretim gut ol samting bilong haus em bai stap long en. Yumi no laik kirap nating tasol o yumi no tingting gut na yumi go mekim wok long narapela hap, nogut yumi givim hevi long ol narapela famili Kristen em ol i wok long karim ol hevi bilong ol yet.—1 Te 4:11, 12; 1 Ti 6:8-11.
4 Yu mas tingim olsem maski yu sindaun long wanem wanem hap, ol hevi inap painim yu. I no hatwok tumas long winim ol hevi long hap yu lain pinis long stap long en, tasol taim yu go sindaun long hap yu no save long en, dispela i gat hatwok bilong en.