Pret Long Jehova Long Olgeta Taim
1 “Sapos yu laik kisim gutpela save, orait pastaim yu mas aninit long Bikpela.” (Snd 1:7) Dispela pasin i kirapim yumi long mekim ol gutpela pasin na i helpim yumi long givim baksait long ol pasin nogut. (Snd 16:6) Pasin bilong pret long Man bilong wokim yumi i makim olsem yumi daun olgeta long em, na i kirapim yumi long sakim ol samting em i no amamas long en na bihainim ol tok bilong em. Yumi mas wok long kisim dispela pasin na bihainim long olgeta taim.—Snd 8:13.
2 Long olgeta de, ol tingting nogut bilong dispela graun bilong Satan i wok strong tru long pulim yumi long bihainim ol pasin nogut bilong ol man. (Ef 6:11, 12) Skin bilong yumi i gat sin, na dispela i laik kirapim yumi long mekim pasin nogut. (Ga 5:17) Olsem na bilong bihainim tok bilong Jehova, stap amamas, na kisim laip, yumi mas pret long Jehova long olgeta taim.—Lo 10:12, 13.
3 Long Hibru 10:24, 25, Baibel i tok, yumi mas bung wantaim na strongim narapela na ‘yumi mas mekim moa yet’ long dispela taim nau yumi stap long en. Sapos yumi laik winim dispela taim bilong las de, em i bikpela samting long yumi mas i go long miting long olgeta taim. Pasin bilong yumi long pret long mekim ol samting God i no amamas long en, dispela i kirapim yumi long go long ol miting na tingim ol miting i gutpela samting tru. Ol man i save pret long God ol i tingim pasin bilong insait long ol miting Kristen em i wanpela wok holi.
4 Pasin bilong bihainim tok bilong Jisas long autim gutnius bilong Kingdom em narapela rot bilong kamapim klia olsem yumi pret long God. (Mt 28:19, 20; Ap 10:42) Wanpela bikpela mak yumi laik winim taim yumi autim tok em yumi laik helpim ol narapela man long kisim pasin bilong pret long Jehova na daun long laik bilong em. Yumi mekim olsem taim yumi mekim ol gobek, wok strong long kirapim ol Baibel-stadi, na lainim ol narapela long olgeta lo bilong God. Taim yumi mekim olsem, yumi kamapim olsem yumi pret long Jehova na yumi laikim ol narapela.—Mt 22:37-39.
5 Ol man i no save pret long God ol i no kisim pasin bilong pilim tru ol samting bilong spirit, na ol i larim tingting nogut bilong dispela graun i bagarapim ol. (Ef 2:2) Yumi mas holimpas strongpela tingting long “litimapim nem bilong [God] na pret long em na aninit long em.” (Hi 12:28) Long dispela rot bai yumi kisim ol blesing Jehova i givim long ol man i pret long em long olgeta taim.