Skul Tiokratik Bilong Autim Tok Bilong Yia 2001
1 I gat planti skripsa i kamapim as tru na yumi olgeta i mas insait tru long Skul Tiokratik Bilong Autim Tok.—Snd 15:23; Mt 28:19, 20; Ap 15:32; 1 Ti 4:12, 13; 2 Ti 2:2; 1 Pi 3:15.
2 Wok bilong kaunim Baibel long olgeta wik em i bin stap olsem hap bilong dispela skul inap longtaim pinis. Taim yumi bihainim sedyul, i olsem yumi save kaunim wanpela pes bilong Baibel long olgeta wan wan de. Kirap long dispela yia ol i bin makim wanpela hap bilong Baibel bilong kaunim long wik bilong rivyu bilong raitim. Dispela namba tu sedyul bilong kaunim Baibel ol i bin putim long sedyul inap 3-pela yia nau, em i pinis. Tasol sapos yu laik kaunim sampela hap moa bilong Baibel, orait yu ken wokim sedyul bilong yu yet bilong kaunim Baibel.
3 Tok Namba 2 i bilong helpim ol brata long lain “long ritim” Tok Bilong God long ol manmeri. (1 Ti 4:13) Taim ol i makim yu long kaunim Baibel, yu mas mekim traim planti taim na kaunim strong. Bilong helpim yu long kaunim gut, yu mas bihainim gut ol tok i stap long Buk Bilong Skul, Stadi 13, 19 na 22. Ol dispela tok i kamapim sampela samting yumi mas mekim bilong kaunim gut, olsem: malolo, kolim stret ol tok na senisim pasin bilong toktok.
4 Tok Namba 3 na Namba 4 ol i kisim long buk Toktok Gut, em dispela buk ol i bin wokim bilong yumi mekim wok long en long autim tok. Sapos hap ol i makim i gat planti tok na yu no inap stori long olgeta tok insait long taim ol i makim, orait yu ken skelim na mekim ol tok i gutpela long bihainim long teritori bilong kongrigesen bilong yupela. Yu ken mekim olsem gobek, autim tok long kain kain taim na ples, o wanem pasin i stret long teritori bilong yupela.
5 Yu mas strong long mekim olgeta tok ol i makim bilong yu long skul. Yu mas redim gut tok na mekim tok olsem yu pilim tru long bel. Taim yu mekim olsem bai yu strongim kongrigesen, na yu yet bai kisim helpim taim yu givim bel olgeta long insait long Skul Tiokratik Bilong Autim Tok long yia 2001.