Skul Bilong Wok Autim Tok Bilong Yia 2000
1 Skul Bilong Wok Autim Tok i kamapim long ples klia olsem em i wanpela gutpela blesing long ol manmeri bilong Jehova. Inap olsem 50 yia, dispela skul i bin helpim planti milion man long lain long pasin bilong mekim pablik-tok na kamap tisa bilong tok i tru bilong Baibel. (Sng 145:10-12; Mt 28:19, 20) Olsem wanem? Yu inap tingim ol samting dispela skul i bin helpim yu long en? Dispela skul inap helpim yu long yia 2000 tu sapos yu insait tru long en na bihainim ol tok wasman bilong skul i givim long yu.
2 Ol lo bilong ol tok na ol buk samting yumi bai mekim tok long en i stap long namba wan pes long sedyul bilong skul bilong yia 2000. Sedyul i stori long ol minit bilong mekim wan wan tok, ol buk samting yumi ken lukim, pasin bilong mekim ol tok, na ol narapela samting tu. Plis kaunim gut ol dispela lo bilong skul na bihainim.
3 Hap Bilong Baibel Yumi Kaunim Long Olgeta Wik: I gat tupela narapela narapela hap bilong Baibel yumi save kaunim long olgeta wik i stap long dispela sedyul bilong skul. Wanpela hap em yumi save kaunim long haus na yumi save kaunim 5-pela pes samting. Ol i save kamapim ol bikpela tok bilong Baibel long dispela hap yumi bin kaunim. Na i gat namba tu sedyul na yumi save kaunim olsem 10-pela pes. Taim yu bihainim dispela sedyul, yu bai kaunim Baibel olgeta insait long 3-pela yia. Sampela i laik kaunim sampela hap moa winim sedyul i makim, na sampela i no inap kaunim olgeta olsem sedyul i makim. Yu mas amamas long hamas pes yu inap kaunim; no ken skelim yu yet wantaim ol narapela. (Ga 6:4) Bikpela samting em yu mas kaunim Tok Bilong God long olgeta de.—Sng 1:1-3.
4 Sapos yu laik insait long Skul Bilong Wok Autim Tok, yu mas toksave long wasman bilong skul. Plis yu mas tingim dispela tok yu bai mekim i bikpela samting, na no ken lusim dispela tok. Yu mas tingim olsem Jehova i givim dispela skul long yu. Redim gut ol tok, save gut long dispela tok, na kamapim gut tingting bilong yu bambai dispela gutpela skul inap helpim yu tru.