Skul Tiokratik Bilong Autim Tok Bilong 2002
1 Yumi man inap toktok, tasol em i wanpela samting planti man i no save tingim tumas. Tasol pasin bilong toktok em i wanpela presen i kam long Jehova. Long dispela rot yumi inap toktok wantaim ol narapela na kamapim ol samting i stap long tingting na bel bilong yumi. Na bikpela samting tru, long dispela rot yumi inap litimapim nem bilong God bilong yumi.—Sng. 22:22; 1 Ko. 1:4-7.
2 Skul Tiokratik Bilong Autim Tok i skulim ol man, meri, na pikinini long litimapim nem bilong Jehova. (Sng. 148:12, 13) Program bilong skul long 2002 bai skelim planti narapela narapela tok bilong Baibel em yumi ken kisim helpim long en na mekim wok long en taim yumi autim tok. Taim yumi redim ol tok bilong skul na insait long en, save bilong yumi bai go bikpela na bai yumi mekim gutpela wok moa olsem ol tisa bilong Tok Bilong God.—Sng. 45:1.
3 Ritim Baibel Long Olgeta De: Sapos oltaim Baibel bilong yumi i stap klostu, yumi inap mekim gutpela wok long hap taim yumi stap nating na ritim Baibel. Planti bilong yumi i gat sampela minit long olgeta de yumi ken lusim bilong mekim dispela samting. Sapos yumi ritim wanpela pes o moa long olgeta de em bai helpim tru yumi, na tu, bai yumi inap bihainim sediul skul i makim bilong ritim Baibel!—Sng. 1:1-3.
4 Taim yumi save long ritim gut tok bilong Baibel, dispela inap helpim yumi long putim tok i go daun long bel bilong ol man na kirapim ol long litimapim nem bilong Jehova. Ol brata i mekim Tok Namba 2 long skul, ol i mas lain na ritim, ritim, ritim strong hap bilong Baibel ol bai mekim long skul. Wasman skul bai givim sampela tok amamas na gutpela tok bilong helpim pasin bilong brata long ritim Baibel i kamap gutpela moa.
5 Yusim Buk Toktok Gut: Tok Namba 3 na 4 i kam long buk Toktok Gut. Ating planti bilong yumi i ken wok strong moa long yusim dispela gutpela buk long wok autim tok. Ol sista i mas makim pasin bilong mekim tok i stret long teritori. Wasman skul i mas lukluk gut long pasin bilong sumatin long mekim wok tisa na mekim wok long Baibel.
6 Gutpela sapos Skul Tiokratik Bilong Autim Tok i helpim yumi olgeta long mekim yet wok long presen God i givim yumi—em pasin bilong toktok—bilong autim gutnius na litimapim nem bilong bikpela God bilong yumi, Jehova!—Sng. 34:1; Ef. 6:19.