Amamas Long Bihainim Tok
1 Jisas i tok, long taim em i kam i stap planti manmeri “i no save long . . . samting bai i kamap long ol,” wankain olsem ol manmeri long taim bilong Noa. (Mt 24:37-39) Olsem na yumi ken save, planti manmeri bai no harim gutnius bilong Kingdom. Wanem samting bai helpim yumi long holim yet pasin bilong amamas long mekim wok autim tok?—Sng 100:2.
2 Namba wan samting i olsem: Yumi mas tingim olsem dispela tok yumi autim na wok bilong autim tok em i kam long God. Sapos ol man i no harim tok bilong yumi maski yumi wok strong, dispela i makim olsem ol i sakim Jehova. Taim yumi tingting olsem God i orait long pasin bilong yumi long autim tok, dispela bai helpim yumi long holim yet pasin bilong amamas long stap yet olsem ol man bilong bihainim tok bilong God.—Je 1:25.
3 Namba tu samting i olsem: I gat sampela man i stap yet em ol bai bilip long rot bilong Jehova long kisim bek ol manmeri. Ating planti man i no laik harim tok, tasol maski pinis i klostu tru i gat sampela man i stap yet em ol i kain olsem sipsip na yumi mas bungim ol. Yumi mas wok yet long autim tok, yumi mas “i go insait long wanpela taun o wanpela ples” bilong “painimaut gut, wanem man bilong dispela ples em i gutpela.”—Mt 10:11-13.
4 Holimpas Stretpela Tingting: Wok nogut lotu giaman i mekim long bipo yet na i kam inap nau i mekim na sampela man i bel hevi. Ol pasin bilong dispela graun i mekim na ‘tingting bilong sampela i paul nabaut, na ol i stap nogut tru.’ (Mt 9:36) Planti ol i bel hevi, long wanem, ol i no gat wok mani, ol i sik, na ol i no stap bel isi. Taim yumi luksave long dispela samting em bai helpim yumi long strong yet long mekim wok bilong yumi. Taim yumi laik kirapim tok wantaim ol man, traim stori long sampela samting ol man long teritori bilong yumi ol i tingting planti long en. Helpim ol long save olsem Kingdom bilong God tasol em i rot bilong stretim dispela hevi. Mekim wok long ol skripsa na sampela tok bilong ol buk samting bilong helpim ol dispela man long pilim tru gutnius.—Hi 4:12.
5 Ol man i amamas long bihainim tok bilong God, oltaim ol i save tingting olsem: ‘Yumi mas amamas long Bikpela na bai em i strongim yumi.’ (Neh 8:10) I no gat as na yumi lusim pasin bilong amamas. ‘Sapos ol manmeri bilong dispela haus i amamas long kisim yumi, orait gutpela tok bilong yumi i ken i stap long ol. Tasol sapos ol i no amamas long kisim yumi, orait yumi ken kisim bek gutpela tok bilong yumi.’ (Mt 10:13) Taim yumi stap isi na mekim wok holi bilong Jehova, em bai givim nupela amamas na strong long yumi, na em bai mekim gut long yumi taim yumi stap gut long em.