Mekim Gutpela Pasin na Dispela Bai Litimapim Nem Bilong Jehova
1 Taim bikpela win na ren i kam, bai yu amamas taim yu lukim haus bilong hait long en! Sapos dispela haus i hat liklik na yu inap stap gut long en na ol man long dispela haus i mekim gut long yu, bai yu amamas long stap long en. Wok bilong autim tok bilong Kingdom i save bringim ol manmeri i go long dispela kain haus taim ol pasin bilong dispela graun bilong Satan i nogutim ol. Olsem wanem? Ol pasin yumi mekim long olgeta de i save kirapim ol narapela long save olsem dispela ples hait em i gutpela samting tru bilong helpim ol? Em nau, olsem Jisas i tok, ol manmeri bai ‘lukim ol gutpela pasin yumi mekim, na bai ol i litimapim nem bilong Papa bilong yumi i stap long heven.’—Mt 5:16.
2 Yumi ken mekim wanem pasin na dispela bai kirapim ol narapela long kam long Jehova na oganaisesen bilong em? Yumi mas larim tok bilong Jisas i stap long Luk 6:31 na Luk 10:27 i stretim pasin bilong yumi long olgeta de. Dispela bai kirapim yumi long laikim na tingim tru ol narapela man, na dispela bai mekim na yumi narapela kain long ol man bilong dispela graun i no save tingim ol narapela.
3 Wanpela sista i raun long sip, em i lukim wanpela yangpela meri i sik nogut tru na dispela meri i no inap lukautim liklik pikinini bilong em. Sista i lukautim pikinini bilong dispela meri. Dispela meri i askim sista long em i ken mekim wanem bilong tok tenkyu long em, sista i tokim em: ‘Taim ol Witnes Bilong Jehova i kam long haus bilong yu, plis harim tok bilong ol.’ Meri i mekim olsem, na nau em na man bilong em ol i kamap Witnes. Gutpela pasin i kirapim ol long harim tok bilong Kingdom.
4 Mekim Gutpela Pasin Long Olgeta Taim: Ol pasin yumi mekim long hap yumi stap long en, long taim yumi stap long wok o long skul, na long taim bilong amamas i save kirapim ol narapela long skelim yumi na lotu bilong yumi. Olsem na yumi mas askim yumi yet olsem: ‘Ol man i gat wanem tingting long mi na long famili bilong mi? Ol man i sindaun klostu long mipela i save lukim olsem haus na banis bilong mipela i stap klin long olgeta taim? Ol wanwok na wanskul i save lukim yumi bihainim stret taim na yumi wok strong? Ol narapela i lukim olsem yumi bilas gut long pasin i stret?’ Gutpela pasin bilong yumi inap mekim na ol narapela i gat laik long lotuim Jehova.
5 Pita i tok ol man bai tok bilas long ol Kristen. (1 Pi 4:4) Yumi mas was gut nogut pasin bilong yumi i mekim na ol man i tok nogut long yumi. (1 Pi 2:12) Sapos ol pasin yumi mekim long olgeta de i litimapim nem bilong dispela God yumi lotuim, orait yumi olsem lam ol man i holim antap, na i singautim ol man long kam long dispela gutpela ples bilong hait Jehova i redim.—Mt 5:14-16.