Jehova i Save Strongim Man
1 Yu gat wanem tingting long aposel Pol? Taim yumi kaunim Buk Aposel, yumi pilim tru pasin bilong em long givim bel long wok bilong Jehova. Olsem wanem Pol inap mekim olgeta samting em i bin mekim? Em i tok: “Krais i save strongim mi, na long strong bilong em mi inap mekim olgeta samting.” (Fl 4:13) Strong Jehova i save givim inap helpim yumi tu. Olsem wanem em inap helpim yumi? Em bai helpim yumi sapos yumi insait long 6-pela samting Jehova i givim long yumi bilong strongim yumi long ol samting bilong spirit.
2 Tok Bilong God: Yumi mas kisim kaikai bilong strongim skin bilong yumi, na olsem tasol yumi mas kisim Tok Bilong God bilong helpim yumi long stap strong long ol samting bilong spirit. (Mt 4:4) Baibel i gat strong bilong strongim yumi. Bilong yumi ken givim bel yet na amamas long tok i tru, yumi mas mekim gut stadi bilong yumi yet na tingim tingim ol tok, na mekim olsem long olgeta de sapos yumi inap.—Sng 1:2, 3.
3 Beten: Em i bikpela samting long i go klostu long Jehova, na em i bikpela samting tru long taim yumi gat hevi. Long rot bilong spirit bilong em, Jehova i save givim strong long ol man i askim em long rot bilong beten. (Lu 11:13; Ef 3:16) Baibel i kirapim yumi long “beten long olgeta taim.” (Ro 12:12) Yu save mekim olsem?
4 Kongrigesen: Yumi save kisim tu strong na ol tok bilong strongim bel bilong yumi long rot bilong ol miting bilong kongrigesen na long rot bilong bung wantaim ol brata sista bilong yumi. (Hi 10:24, 25) Taim yumi bel hevi, ol i save strongim bel bilong yumi na mekim pasin sori na helpim yumi.—Snd 17:17; Sav 4:10.
5 Wok Autim Tok: Taim yumi insait long wok autim tok long olgeta taim, dispela i save helpim yumi long tingim Kingdom na ol blesing yumi bai kisim. Bel bilong yumi amamas taim yumi helpim ol narapela long kisim save long Jehova. (Ap 20:35) I no olgeta bilong yumi inap i go long hap i sot long ol man bilong autim tok o mekim wok bilong God long olgeta de, tasol yumi ken insait tru long wok autim tok long ol narapela rot.—Hi 6:10-12.
6 Ol Wasman Kristen: Ol elda i save givim ol gutpela tok bilong strongim bel bilong yumi na helpim yumi. Jehova i bin givim wok long ol long was long ol sipsip bilong em i stap long han bilong ol. (1 Pi 5:2) Olsem Pol i bin mekim long taim bilong em, ol wasman bilong raun i save strongim ol kongrigesen ol i save go lukim.—Ro 1:11, 12.
7 Pasin Bilong Ol Manmeri i Stap Gut Long God: Taim yumi skelim gutpela pasin bilong ol wanbilip bilong bipo na bilong nau em ol i stap gut long God, dispela i strongim bel bilong yumi. (Hi 12:1) Sapos yu laik kisim nupela strong, yu ken kaunim ol gutpela stori bilong ol brata long ol nius bilong yumi, o yu ken kaunim ol gutpela ripot long yiabuk, o sampela gutpela stori bilong ol samting i bin painim ol Witnes Bilong Jehova bilong nau em i stap long buk Proclaimers.
8 Wanpela brata nau em i gat 95 krismas samting, em i bin kisim tok i tru taim em i yangpela man. Taim em i yangpela yet, ol samting i bin traim bilip bilong em. Pastaim, sampela man em bipo ol bung oltaim wantaim kongrigesen ol i lusim oganaisesen bilong Jehova. Na em i save hatwok long autim tok long ol haus. Tasol oltaim em i askim Jehova long helpim em. I no longtaim na em i amamas long autim tok. Na olsem wanem long nau? Maski em i save sik, em i mekim yet wok olsem wanpela bilong famili Betel long Bruklin, na em i wanpela bilong lain Gavening Bodi. Em i no bel hevi long em i bin stap gut long oganaisesen bilong Jehova.
9 Wanpela sista em i wok long Betel long Briten, em i baptais taim em i gat 13 krismas. Long yia bihain em i kirap mekim wok painia wantaim brata bilong em, na long yia bihain long dispela, ol i putim papa bilong em long kalabus, long wanem, em i no bin insait long ami long taim bilong Namba Tu Pait. Dispela sista i bilip na wetim Jehova i givim strong long em, na em i wok yet long mekim wok bilong trupela God. Bihain em i maritim wanpela gutpela brata, na tupela wantaim i mekim laik bilong Jehova. Ol i marit inap 35 yia na man bilong em i dai wantu tasol. Em i askim gen Jehova long givim strong long em na em i mekim yet wok bilong Jehova inap long nau, na em i wetim taim em bai wok oltaim olsem wanpela bilong famili bilong Jehova long graun.
10 Jehova i save helpim na strongim ol gutpela wokman bilong em. “Bikpela i save strongim ol man i no gat strong, na taim bun bilong ol i slek pinis, em i save mekim ol i stap strong.” Yumi inap kisim dispela strong i no save pinis sapos yumi kisim helpim long dispela 6-pela rot mipela i kolim pinis. Tingim: “Ol manmeri i bilip long Bikpela na i wetim em i helpim ol, ol bai i stap strong oltaim. . . . Bai ol i ran na ol i no inap sotwin, na bai ol i wokabaut na ol i no inap les.” (Ais 40:29-31) Pol i bilip tru na wetim Jehova long givim strong long em, na yumi tu mas mekim olsem.