Tingim Ol Samting Bilong Bihain—Wanem Ol Samting?
1 Sampela taim yumi olgeta i save tingim ol samting yumi laik mekim long bihain. Ol man i tingting long kisim laip long graun, ol i wetim taim bilong stap oltaim long nupela taim God bai kamapim na stretpela pasin tasol i stap long en. Tasol i gat ol samting em inap rausim dispela tingting long bel bilong yumi. Yumi mas wok strong bambai yumi ken wok long givim bel long ol wok bilong Kingdom na ol laik bilong skin i no ken pulim yumi.—1 Jo 2:15-17.
2 Ol man bilong dispela graun ol i kirap nogut long ol samting ol man bilong tingim ol samting bilong spirit ol i laik mekim. (1 Ko 2:14) Ol man bilong graun i wok strong long kisim biknem, namba, na mani kago, tasol yumi strong long kisim ol samting bilong spirit. (Mt 6:19-21) Sapos yumi traim long stiaim tingting bilong yumi long kamap wankain olsem tingting bilong ol man bilong graun long ol samting bilong bihain, yu ting yumi inap winim ol mak bilong spirit? I no longtaim na bai yumi tingim tasol ol samting bilong skin. Yumi ken mekim wanem na dispela samting i no ken kamap?
3 “Yupela i Mas Kisim Bikpela Jisas Krais”: Wanpela rot bilong save yumi tingting long mekim ol wok bilong Kingdom o nogat em olsem: Yumi ken skelim ol samting yumi save toktok long en. Yumi save toktok long mani kago na long ol samting bilong skin long olgeta taim? Sapos yumi mekim olsem, orait yumi mas skelim bel bilong yumi, nogut yumi no tingim moa ol samting bilong spirit. Ating yumi mas wok strong moa long ‘kisim bikpela Jisas Krais na pasim em olsem klos pait bilong yumi. Na yumi no ken tingting long bihainim laik nogut bilong bodi.’—Ro 13:14.
4 Ol yangpela inap ‘kisim Krais’ na tingting long mekim wok bilong God long olgeta de. Wanpela yangpela i laik mekim wok painia, em i go bikpela long wanpela ples em pasin bilong ol yangpela man long kisim gutpela wok mani samting. Olsem na em i givim bel tru long mekim wok bisnis, em i go long ol miting na wok autim tok, tasol em i go nating. Taim em i kirap bilip tru long tok bilong Jisas i stap long Matyu 6:33 na em i lusim wok i kisim olgeta strong na taim bilong em, orait em i kirap mekim wok bilong God long olgeta de. Nau bel bilong em i no kotim em moa, na em i mekim wok bilong Jehova ‘long save na strong olgeta bilong em,’ olsem em yet i tok.
5 Baibel i tok, em i savepasin long tingim ol samting bilong bihain. (Snd 21:5) Em i gutpela yumi olgeta i mekim olsem na tingim laik bilong God pastaim.—Ef 5:15-17.