Tingim Ol Samting Yu Bai Mekim Bihain!
1 Long olgeta taim oganaisesen bilong Jehova i save stretim ol wok bilong inapim yumi long kisim ol samting bilong spirit. Yumi amamas long ol dispela samting na dispela i kirapim yumi long insait tru long olgeta wok oganaisesen i redim, olsem raun bilong wasman sekit na wasman distrik, ol kibung sekit na kibung distrik, na ol narapela wok kongrigesen i tingting pinis long mekim. (Mt 5:3) Tasol sampela brata sista ol i no kisim ol gutpela samting long rot bilong ol dispela samting bilong spirit, long wanem, ol i pasim tok pinis long mekim ol narapela samting. Yumi ken mekim wanem bambai dispela samting i no ken kamap? Na yumi ken mekim wanem bambai ol narapela wok i no pasim yumi long mekim ‘ol samting i bikpela samting moa’?—Fl 1:10, NW.
2 Tingting Gut Long Samting Yu Bai Mekim Bihain: Sindaun 21:5 i tok: “Ol man bilong wok ol i save tingting gut na mekim wok, olsem na wok bilong ol i kamap gutpela . . . Tasol sapos ol man i hariap tumas long mekim wok, bai wok bilong ol i no kamap gutpela.” Bilong kisim ol gutpela samting bilong spirit, yumi mas tingting gut pastaim long ol samting yumi bai mekim, na tingim gut ol wok bilong spirit oganaisesen i makim pinis. Yumi mas wokim sedyul olsem: Ol wok bilong yumi yet yumi mas mekim long ol hap taim em bai i no pasim yumi long i stap wantaim ol brata sista bilong kisim ol blesing bilong spirit. Sapos yumi hariap long pasim tok long mekim ol samting yumi yet i laik mekim, na yumi no tingim gut ol wok bilong spirit bai kamap, yumi bai stap nogut long ol samting bilong spirit.
3 Yu No Ken Lusim! Yumi olgeta i tingim pinis ol samting yumi bai mekim bihain, olsem ol de bilong malolo, ol raun long mekim wok bisnis, go lukim ol wanfamili, na sampela samting moa. Paslain long yu stretim ol samting long raun bilong yu, lukim sedyul bilong yu long ol wok bilong spirit em bai kamap bihain. Sapos yu lukim olsem wasman sekit bai kam, o kibung bai kamap long taim yu mas go long narapela hap, orait wok strong long senisim gen ol samting bilong yu bambai yu ken i stap na insait long dispela wok bilong spirit. Yumi kisim toksave bilong ol bikpela samting bai kamap inap planti mun paslain long ol dispela samting i kamap. Ol elda inap toksave long yupela long ol samting kongrigesen i tingting pinis long mekim.
4 Sapos yumi tingim gut ol wok bilong spirit em bai kamap bihain na stretim rot bilong mekim, orait bai yumi pulap long “ol stretpela pasin . . . i givim biknem long God na litimapim nem bilong en.”—Fl 1:11.