Wok “Strong” Long Autim Tok
1 Taim yumi ritim olsem aposel Pol i bin wokim ol haus sel long Korin, yumi inap ting em i no gat bikpela hap taim bilong autim tok. Tasol Aposel 18:5 i tok: “Pol i wok long autim tok bilong God long olgeta de. Em i autim tok strong long ol Juda olsem, ‘Jisas em i man God i makim bilong kisim bek ol manmeri bilong en.’ ” Bilong wanem Pol i givim bel tru long wok autim tok? Maski planti man long Korin i bin kamap bilipman pinis, Bikpela i tokim Pol olsem i gat planti disaipel moa i stap yet long dispela taun. (Ap 18:8-11) Olsem wanem? I gat wankain as na yumi tu i mas wok strong long autim tok? Yes, i gat. Yumi inap painim planti manmeri moa na lainim ol long tok i tru.
2 Lusim Bikpela Hap Taim Moa Long Autim Tok Long Epril: Ating yu gat laik long givim bel long autim gutnius long olgeta mun. Tasol i gat sampela mun yumi inap wok “strong” moa long mekim dispela wok. Wanpela mun olsem em Epril, em taim bilong Memorial. Olsem wanem? Yu gat rot long mekim wok painia haptaim o lusim bikpela hap taim moa long autim tok long ol dispela mun? Planti pablisa i wok long mekim olsem, ol i bin kisim planti gutpela blesing. (2 Ko 9:6) Sapos yu wok long mekim ol samting long skel tru bilong yu, tingim olsem Jehova i amamas long pasin bilong yu long givim bel long wok. (Lu 21:2-4) Maski i stap bilong yu i wanem kain, putim mak olsem yu laik wok “strong” long autim tok long Epril. Na yu no ken lusim tingting long putim ripot bilong wok autim tok long pinis bilong mun bambai ol i ken bungim wantaim ripot bilong olgeta narapela manmeri bilong Jehova.
3 Go Lukim Ol Nupela Man i Bin Kam Long Memorial: Long yia i go pinis, inap 16,347 manmeri i bin kam long Memorial. Yumi no save yet hamas manmeri i bung long dispela yia. Tasol ol ripot i kamapim olsem i gat planti ‘kaikai i mau pinis long gaden’ i stap yet bilong bungim. (Mt 9:37, 38) Olsem na go hariap lukim ol man i bin kam long Memorial na helpim ol long ol samting bilong spirit. Sapos yu no go hariap, dispela bai opim rot long ‘Satan long kam na kwiktaim rausim dispela tok God i bin planim long bel bilong ol.’ (Mt 13:19) Taim yu go hariap lukim ol dispela man, dispela bai soim olsem yu wok “strong” long autim tok.
4 Helpim Yet Ol Man i Lusim Wok Autim Tok: Long Februeri yumi bin kirap wok strong long helpim ol man i lusim wok autim tok. Sapos ol elda i no bin go lukim yet sampela brata sista olsem, orait ol i mas stretim rot bilong go lukim ol paslain long pinis bilong mun Epril. Ol elda bai traim kisim save long as bilong hevi bilong brata o sista na olsem wanem ol i ken helpim em long mekim gen wok bilong Jehova. Dispela gutpela pasin bilong helpim ol man i soim olsem ol elda i tingim tru wok bilong ol long lukautim gut “ol manmeri bilong God.” (1 Pi 5:2; Ap 20:28) Long Wastaua bilong Septemba 15, 1993, pes 22-23, i gat ol gutpela tok ol elda i ken mekim taim ol i stori long 5-pela hevi bilong planti man i lusim wok autim tok. Gutpela tru sapos yumi inap kirapim sampela moa long mekim gen wok autim tok long Epril.
5 Helpim Planti Moa Long Kamap Pablisa i No Baptais Yet: Olsem wanem? Ol pikinini bilong yu i winim mak bilong kamap nupela pablisa? Na olsem wanem long ol narapela man yu save stadi wantaim ol long Baibel? Sapos ol elda i orait long ol i kamap pablisa, mun Epril em i gutpela taim tru long ol i kirap autim tok, a? Sapos man i wok long kamap strong na em i stadi pinis long buklet Yumi Mas Mekim Wanem? na buk Save, orait yu ken stadi wantaim em long namba tu buk—buk Stap Oltaim. Yu mas tingting long helpim sumatin long kisim gutpela save long tok i tru, na winim mak bilong kamap pablisa i no baptais yet, na dediket na kisim baptais olsem wanpela Witnes Bilong Jehova.—Ef 3:17-19; 1 Ti 1:12; 1 Pi 3:21.
6 Pasin bilong yu long tingim tru ol sumatin bilong yu long olgeta taim inap helpim ol long pilim tru tok i tru. Wanpela Witnes i bungim tupela marit i lapun liklik na ol i amamas long stadi long Baibel. Tasol inap tripela wik tupela i no stadi. Bihain ol i kirap stadi long Baibel. Tasol bihain, klostu olgeta tupela tupela wik tupela i no stadi. Tasol isi isi meri i kamap strong na kisim baptais. Brata i tok: “Taim em i baptais pinis, em i amamas tru na aiwara i pulap long ai bilong em, na dispela i mekim na aiwara bilong amamas i pundaun long ai bilong mi na meri bilong mi.” Em nau, pasin bilong wok “strong” long autim gutnius i kamapim bikpela amamas!
7 Ol tok profet bilong Baibel na ol samting i wok long kamap long graun i kamapim klia olsem yumi stap tru long pinis bilong taim bilong las de. Nau em taim bilong olgeta long lain bilong God long wok “strong” long autim gutnius long ol narapela man. Aposel Pol i tok, kain hatwok olsem bilong mekim wok bilong Bikpela “bai i no inap lus nating.”—1 Ko 15:58.