Mekim Tok i No Hatwok Long Kisim
1 Bilong wanem planti man i save putim yau long tok bilong ol yangpela pablisa taim ol i autim tok bilong Kingdom? Wanpela as i olsem: Ol i mekim ol tok i no hatwok long kisim. Ating sampela pablisa i ting, bilong ol i ken autim tok gut ol i mas save gut tru long pasin bilong toktok. Tasol ol samting i bin kamap i soim olsem taim yumi toktok wantaim ol man, i gutpela moa long mekim ol tok i klia na i no hatwok long kisim.
2 Taim Jisas i autim tok bilong Kingdom bilong God, em i tokaut klia stret long ol samting na em i mekim ol tok i no hatwok long kisim, na em i lainim ol disaipel long mekim wankain pasin. (Mt 4:17; 10:5-7; Lu 10:1, 9) Kirap bilong tok, ol askim, na tok piksa em i mekim i kirapim tru ol man long putim gut yau na pilim ol tok. (Jo 4:7-14) I gutpela yumi bihainim pasin bilong em na mekim ol tok ol man i no hatwok long kisim.
3 Tok yumi mas autim em “gutnius bilong kingdom.” (Mt 24:14) Taim yu stori long Kingdom, dispela bai helpim yu long kamapim ol tok i no hatwok long kisim. Toktok long ol samting ol man i save tingting long en. Planti meri i save tingim famili bilong ol na ol i no tingting tumas long ol samting bilong wok politik. Ol papa i save tingting long wok mani bilong ol na long bagarap i no ken painim famili bilong ol. Ol yangpela i save tingim ol samting bai kamap bihain, na ol lapun i save tingting long rot bilong winim ol sik na long gutpela sindaun. Planti man i save tingim ol samting i kamap long hap bilong ol, winim ol samting i save kamap long ol kantri i stap longwe. Taim yu toktok pinis wantaim man long ol samting em i save tingting long en, stori long ol gutpela samting ol man i harim tok bai kisim taim Kingdom bilong God i bosim graun. Ating nambawan gutpela rot bilong kirapim laik bilong man long harim tok, em pasin bilong kamapim klia sampela gutpela tok tasol na wanpela skripsa.
4 Bilong kirapim toktok yu ken tok:
◼ “Ating yu wanbel long tok olsem planti manmeri i gat ol sik em ol dokta i no inap oraitim. Tasol olsem wanem? Yu save olsem God i tok promis pinis olsem klostu nau em bai pinisim olgeta kain sik, na indai tu?” Larim man i bekim tok, na nau ritim Kamapim Tok Hait 21:3, 4.
5 Mekim ol tok i no hatwok long kisim na planti man moa long teritori bilong yu bai pilim tru tok bilong yu, na dispela bai helpim ol long kisim save long Jehova na tingting long kisim laip oltaim.—Jo 17:3.