Nupela Program Bilong Kibung Sekit
Wanpela mining bilong dispela tok pret em olsem pasin bilong tingim bikpela strong bilong God na daun olgeta long em. Dispela i makim stretpela pasin bilong pret em Baibel i tok em bai “givim gutpela tingting” long man. (Sng. 111:10) Tasol narapela kain pasin bilong pret i bosim dispela graun bilong Satan. Olsem wanem yumi inap sakim dispela tingting kranki na kisim pasin bilong pret na daun long Jehova? Nupela program bilong kibung sekit bilong 2002 i skelim dispela askim. As tok bilong kibung i olsem: “Pret Long God na Litimapim Nem Bilong Em.” (KTH 14:7) Bai yumi kisim save long planti rot em pasin bilong pret long Jehova i helpim yumi wan wan na oganaisesen olgeta.
Tru, pasin bilong pret inap makim olsem yumi tingting planti o bel bilong yumi i no strong moa na yumi no laik bai ol hevi i painim yumi, tasol Baibel i tok: “Yu wanem man o meri i save pret long Bikpela na i save bihainim tok bilong en, yu ken amamas.” (Sng. 128:1) Program bilong kibung bai soim yumi long olsem wanem yumi ken mekim gut ol wok bilong trupela lotu. Bai yumi kisim save long olsem wanem yumi ken helpim ol nupela long kisim stretpela pasin bilong pret long God, em dispela samting bai kirapim laik bilong ol long mekim wok bilong em long bel, tingting, na strong olgeta bilong ol. (Mk. 12:30) Laspela tok bilong namba wan de em tok bilong wasman distrik “Pas Gut Moa Yet Long Ol Lain Yu Laikim Ol Tru.” Em bai stori long olsem wanem yumi ken was gut long ol samting Satan i save mekim bilong pulim yumi long lusim Jehova, famili bilong yumi, na ol brata Kristen.
“Pret Long Jehova, Ol Man Nogat” em nem bilong tok i gat 4-pela hap bai kamap long namba tu de. Ol tok bai stori gut long bilong wanem na olsem wanem yumi mas winim pasin bilong pret i save pasim yumi long mekim wok autim tok, o stap gut long God, o stap stret long skul na ples wok na bai bel i no gat tok. Pablik-tok “Pret Long God na Bihainim Ol Lo Bilong Em,” i skelim ol samting Kamapim Tok Hait sapta 14 i stori long en. Laspela tok bilong kibung sekit bai strongim yumi long “Bihainim Yet Pasin Bilong Pret Long God.”
Skul Tiokratik Bilong Autim Tok, Miting Bilong Wok, tok bilong baptais, na stori bilong Wastaua em ol narapela hap bilong program yu mas harim tu. Singautim ol Baibel-stadi bilong yu i kam wantaim yu. Ol man i laik kisim baptais i mas toksave hariap long wasman siaman. Yumi olgeta i laik kamapim klia pasin bilong yumi long pret long Jehova na givim biknem long em long rot bilong harim olgeta hap bilong dispela gutpela program!