Narapela i Strongim Bel Bilong Narapela
1 Ol hevi bilong traim bilip i save painim lain bilong Jehova long olgeta de. Satan i save em i gat sotpela taim tasol i stap, olsem na em i wok strong na bai yumi no stap gut moa long Jehova. (KTH 12:12) Em bikpela samting long yumi mas wok yet long kisim “strong” long Bikpela bambai ‘long taim nogut yumi inap sanap strong long pait.’—Ef. 6:10, 13.
2 Pasin bilong bung wantaim ol wanbilip em samting Jehova i bin putim bilong helpim yumi long kisim strong. Em samting aposel Pol i pilim tru. Em i gat bikpela laik tru long stap wantaim ol brata Kristen na bai narapela i ken “strongim bel” bilong narapela na “olgeta wantaim” i ken stap strong. (Ro. 1:11, 12) Bilong strongim yumi long wok bilong God yumi mekim, Gavening Bodi i bin stretim rot na bai narapela i ken strongim bel bilong narapela long “Ol Man Bilong Givim Bel Long Autim Tok Bilong Kingdom” Kibung Distrik.
3 Go Long Kibung: Yumi mas putim mak bilong i stap long olgeta 3-pela de. Bilong kibung i ken helpim gut yumi, yumi mas kam paslain long namba wan singsing na stap i go inap long yumi ken tok “Amen” long laspela beten. (Ais. 48:17, 18) Planti ol i mas senisim sediul bilong wok bilong ol paslain tru long kibung na bai ol inap go long olgeta 3-pela de bilong en. Tru, ating bai i hatwok liklik long kirapim bos long givim sampela de malolo long yu, tasol Jehova i bin tok promis olsem em bai helpim yumi long bihainim laik bilong em. (1 Jo. 5:14, 15) Sapos yumi no mekim yet, orait nau em taim bilong stretim rot bilong kisim PMV samting na ples slip na bai yumi ken go long kibung—nogut yumi ting rot bai op nating. Yumi ken bilip strong olsem Jehova bai mekim gut long olgeta wok yumi mekim bilong go long olgeta 3-pela de.—Snd. 10:22.
4 Redi Long Kisim Gutpela Tok: Olsem wanem? I gat wanpela taim bipo na taim kibung distrik i pinis, yu bin tok: “Dispela kibung i bin winim tru ol narapela kibung”? Sapos olsem, orait ating i gat wanem as na yu bin pilim olsem? I olsem: Yumi ol man bilong graun inap lusim strong, olsem na yumi mas kisim sampela tok bilong strongim yumi long ol samting bilong spirit. (Ais. 40:30) Wanpela sista i tok: “Ol hevi bilong dispela taim nogut i save daunim mi, na ol kibung i helpim mi long tingim gen ol samting mi wetim i kamap na i strongim mi long ol samting bilong spirit. Ol tok bilong strongim mi i kam long taim stret mi mas kisim.” Ating wankain samting i bin painim yu tu, a?
5 Yumi save kisim gutpela strong long rot bilong ol tok na ol inteviu, na long ol narapela hap bilong program tu. Wanpela brata i tok: “Mi laikim tru ol tok i stori long olsem wanem yumi ken bihainim ol stiatok bilong Baibel. Ol pilai bilong Baibel i gutpela tu bilong helpim yumi long save olsem ol samting i bin kamap bipo—ol gutpela samting na ol samting nogut—i ken helpim yumi olsem wanem. Mi save amamas long kisim ol nupela buk, na bihain tru long mi go bek long ples, mi amamas yet long ol.”
6 Ol kibung ol i bikpela samting tru Jehova i bin putim bilong helpim yumi nau long dispela taim bilong “planti hevi nogut tru.” (2 Ti. 3:1) Ol i helpim yumi long bihainim dispela tok bilong Baibel: “Yupela i mas was gut na sanap strong long bilip. Yupela i mas i stap strong, na yupela i no ken pret long wanpela samting.” (1 Ko. 16:13) Olsem na yumi mas tingting strong long stap long olgeta hap bilong program na amamas long ol gutpela tok bilong strongim bel em yumi inap kisim long “Ol Man Bilong Givim Bel Long Autim Tok Bilong Kingdom” Kibung Distrik!
[Blok long pes 11]
Tingting Long Go Long Kibung Long Olgeta Tripela De
■ Askim bos long givim hap taim long yu na bai yu ken go long kibung.
■ Stretim rot bilong kisim ples slip.
■ Stretim rot bilong kisim PMV samting bilong go long kibung.