Yu Save Amamas Long Ol Samting God i Givim Long Yu?
1 Taim wanpela i askim olsem yu save amamas long ol samting God i givim long yu, ating wantu bai yu tok yes! Wanem sampela samting holi God i givim long yumi na yumi amamas long en?
2 Em i gutpela tru yumi gat rot long kamap pren bilong Papa bilong yumi long heven na pas gut wantaim em! Em i tokim yumi olsem sapos yumi ‘go klostu tru long em, em bai i kam klostu tru long yumi.’ (Je 4:8) Sapos Jisas Krais i no bin i dai bilong baim bek yumi, i no gat wanpela man inap kisim laip i stap oltaim. (Jo 3:16) Taim yumi pilim tru dispela gutpela pasin bilong Jehova, long olgeta de long rot bilong beten yumi bai kamapim olsem yumi amamas tru long dispela gutpela presen i kam long God.
3 Tok Bilong God, em Baibel, em tu i samting holi long yumi, na oganaisesen bilong Jehova i stap long graun em tu i samting holi. Taim yumi bihainim ol lo bilong Baibel, na strongim pasin bilong laikim tru ol brata, na bihainim gut ol pasin tiokratik, na wok gut wantaim ol man i bosim yumi, yumi soim olsem yumi pilim tru ol dispela samting Jehova i givim long yumi.—1 Pi 1:22.
4 Long rot bilong ol wokboi i gat gutpela tingting na save, yumi save kisim planti gutpela kaikai bilong spirit. Bai yumi kisim ol dispela gutpela samting long dispela yia long 8-pela “Ol Man Bilong Bihainim Tok Bilong God” Kibung Distrik. Long dispela kibung bai yumi kisim ol gutpela tok na bai yumi amamas long bung wantaim ol narapela, em ol bikpela samting bilong helpim yumi. Olsem wanem yumi ken soim olsem yumi amamas tru long dispela samting God i redim bilong yumi?
5 No Ken Lusim Haus Bilong Jehova: Nehemia i tok ol man i bin wok strong long wokim gen banis bilong Jerusalem ol i ‘no ken lusim haus bilong God.’ (Neh 10:39) Long nau “haus” bilong Jehova em rot em i stretim bilong yumi ken lotuim em. Ol kibung distrik tu i hap bilong dispela rot God i stretim. Yumi mas i stap long dispela kibung na harim gut ol tok. Long dispela rot yumi kamapim long Jehova olsem yumi tingim ol dispela samting em i givim long yumi ol i bikpela samting tru na yumi no laik lusim. (Hi 10:24, 25) Yumi ken mekim wanem long nau bilong soim olsem yumi amamas tru long dispela bung holi?
6 Kam Long Tripela De Olgeta: Yumi olgeta wan wan i mas stretim rot na kam long tripela de olgeta bilong kibung. Olsem wanem? Yu tingting long kam long olgeta de na stap i go inap long laspela beten long Sande? Sapos yu mekim olsem bai yu kisim planti blesing. Tru, ating bai i hatwok long kam long ol kibung. Ating yu mas strongim bel taim yu laik askim bos long senisim taim bilong yu long wok. Ating bai i hatwok long painim ka bilong i go long kibung. Tasol yu no ken larim ol dispela samting i pasim yu long go long kibung.
7 Tingim Dispela Gutpela Stori: Long yia i go pinis, sampela lain brata bilong wanpela kantri long Afrika i gat pait long en ol i laik i go long kibung distrik, na taim ol i wokabaut i go ol i bungim wanpela lain ami long rot. Ol soldia i askim ol brata olsem: “Yupela husat, na yupela i go we?” Ol brata i tok: “Mipela ol Witnes Bilong Jehova, na mipela i go long kibung distrik.” Wanpela soldia i tok: “Yupela ol Witnes Bilong Jehova i no save pret long wanpela samting. Yupela go tasol, na bai yupela mekim kibung bilong yupela, no gat wanpela hevi bai painim yupela. Tasol yupela i mas save, yupela bai bungim planti soldia long rot. Wokabaut namel long rot long olgeta taim! Sapos yupela i lukim planti manmeri i bung long rot, wokabaut tasol namel long rot i go!” Ol i mekim olsem na ol i kamap gut long kibung. Ol dispela brata i kisim gutpela samting, long wanem, ol i kamapim olsem ol i amamas tru long ol samting God i givim long ol.
8 Olsem ol dispela brata bilong yumi long Afrika, ol hevi i save painim yumi tu. Tasol yumi inap bihainim strongpela bilip bilong ol na i go long olgeta de bilong kibung distrik bilong yumi. Sapos yu mas senisim sampela samting na bai yu ken i go long olgeta de, beten long Jehova long givim tingting long yu, na yu mas save olsem Jehova bai blesim hatwok yu mekim bilong go long kibung long olgeta de.
9 Kisim Ol Blesing: Yumi gat bikpela laik tru long kisim save long Tok Bilong God, long wanem, yumi save olsem long dispela rot God bai i kisim bek yumi. (1 Pi 2:2) Taim yumi go long kibung distrik na harim ol tok bilong Baibel, dispela bai helpim yumi wan wan long bilip strong moa long dispela Tok Bilong God, na em bai helpim yumi long sakim pait bilong Satan. Taim yumi mekim olsem, yumi bai kamapim long Jehova na ol man olsem yumi amamas tru long ol samting God i givim long yumi, na “yumi no man bilong surik . . . Nogat tru. Yumi ol manmeri bilong bilip na kisim laip.”—Hi 10:39; 12:16; Snd 27:11.
10 Yumi amamas long God Jehova bai givim planti gutpela samting bilong spirit long yumi. (Mal 3:10) Putim mak olsem yu mas i go long “Ol Man Bilong Bihainim Tok Bilong God” Kibung Distrik kirap long namba wan de bilong kibung long Fraide moningtaim i go inap long taim ol i tok “Amen!” long laspela beten long Sande apinun. Bai yu amamas long yu bin mekim olsem!