Ol Kibung—Taim Bilong Amamas!
1 Ol kibung bilong ol Witnes Bilong Jehova ol i bung bilong bikpela amamas. Winim wan handet yia nau, ol dispela bung i bin helpim wok bilong oganaisesen bilong yumi i go bikpela. Pastaim lain bilong Jehova i liklik, tasol Jehova i bin blesim wok bilong yumi long olgeta hap. Long namba wan kibung bilong ol Witnes long Chicago, Illinois, long 1893, inap 360 i bung na 70 bilong ol i kisim baptais bilong makim olsem ol i dediket pinis long Jehova. Long “Ol Man Bilong Bihainim Tok Bilong God” Kibung Distrik bilong las yia, inap 9,454,055 i bung na 129,367 i kisim baptais. Dispela em i samting bilong amamas tru long en!
2 Kirap long taim bilong ol man i bin raitim Baibel, ol bung bilong lain bilong God i wanpela bikpela rot bilong Jehova long skulim ol man. Long taim bilong Esra na Nehemia, ol manmeri i putim yau taim ol i ritim Lo “long moningtaim tru i go inap long belo.” (Neh. 8:2, 3) Long dispela bung ol manmeri i kisim gutpela save moa long tok bilong Lo, olsem na ol i “amamas.” (Neh. 8:8, 12) Yumi tu i amamas long ol kibung i opim rot na Jehova i ken givim gutpela tok na kaikai bilong spirit “long taim bikman i makim” long rot bilong “wokboi i gat gutpela tingting.” (Mt. 24:45) Jisas i tok, ol man “i mas bihainim olgeta tok bilong God tu na bai ol i kisim laip,” olsem na ol kibung i bikpela samting bilong helpim yumi long stap gut long ol samting bilong spirit.—Mt. 4:4.
3 Hatwok Yumi Mekim Bilong Bung Bai No Lus Nating: Yumi olgeta i mas putim mak long stap long olgeta de bilong “Ol Tisa Bilong Tok Bilong God” Kibung Distrik. Yumi mas stretim ol samting bilong kam hariap long olgeta de, na stap i go inap long yumi bungim maus na tok “Amen!” long laspela beten. Bilong mekim olsem, ating yumi mas senisim sediul bilong yumi. Taim yumi askim bos long givim malolo bilong yumi ken go long kibung, dispela inap kamapim sampela hevi. Yumi mas tingting strong long go long kibung, yumi no ken ting olsem taim olgeta samting i wok gut, orait nau yumi go long kibung. Sapos yumi mas kisim ples slip o PMV samting bilong go long kibung, yumi mas stretim hariap ol dispela samting. Olgeta hatwok yumi mekim bilong go long kibung bai no lus nating!
4 Lain bilong Jehova i no tingim mani ol i tromoi bilong go long kibung taim ol i skelim ol gutpela samting ol i kisim long kibung. Tingim ol samting sampela i bin mekim em ol i strong long go long Laik Bilong God Kibung Intenesenel long biktaun New York, long 1958. Wanpela brata i pasim konstraksen bisnis bilong em inap 2-pela wik, bilong em i ken mekim wok volantia na go long kibung. Wanpela brata long Ol Ailan Vejin i salim inap 2 hekta graun bambai famili i gat 6-pela long en ol inap i go long kibung. Tupela yangpela marit i salim mota-bot bilong ol bambai ol i ken kisim olgeta 3-pela pikinini i go long kibung, em krismas bilong ol i 2-pela mun i go inap 7-pela krismas. Bos bilong 3-pela brata long California i tok, sapos ol i no kam long ples wok, bai ol i no gat wok moa taim ol i kam bek bihain long kibung. Tasol dispela i no pasim ol long go long dispela bikpela kibung.
5 Jehova i Blesim Hatwok Bilong Yumi: Jehova i lukim na blesim ol hatwok lain bilong em i mekim. (Hi. 6:10) Olsem: Ol man i go long kibung Theocracy’s Increase long 1950, ol i harim bikpela tok “Nupela Taim.” Brata Frederick Franz i kirapim tingting bilong olgeta na tok: “Ating ol man i kam long dispela kibung intenesenel ol i amamas long harim olsem, long nau nait, namel long yumi, i gat ol man em ol bai kamap bikman bilong nupela graun.” Winim 50 yia bihain, yumi amamas yet long dispela nupela save yumi kisim long tok bilong Song 45:16.
6 Bihain long ol i go long kibung distrik bilong las yia, wanpela het bilong famili i tok: “Ol brata, yupela i no inap save long bikpela helpim tru dispela kibung i bin givim long mipela. Mipela famili i go sindaun long narapela taun bilong painim wok mani, tasol mipela i go slek long ol samting bilong spirit. . . . Mipela i no mekim ol wok Kristen bilong mipela. Mipela i no go moa long ol miting na mipela i lusim wok autim tok olgeta. . . . Dispela kibung i strongim mipela, na nau mipela i putim gen ol mak bilong spirit na mipela i wok long stretim ol samting bilong winim ol dispela mak.”
7 Jehova i givim yumi kaikai bilong spirit em yumi mas kisim. Em i givim bikpela kaikai bilong spirit long ol kibung. Yumi pilim tru dispela samting, olsem na ating yumi inap mekim wankain tok olsem Kornilius i bin mekim taim aposel Pita i kam lukim em. Em i tok: “Nau mipela olgeta i kam i stap hia long ai bilong God bilong harim olgeta tok Bikpela i bin givim long yu bilong tokim mipela.” (Ap. 10:33) Yumi olgeta i mas putim mak long stap long “ai bilong God” long olgeta hap bilong program bilong “Ol Tisa Bilong Tok Bilong God” Kibung Distrik bilong dispela yia, na stap amamas wantaim!