Tingim Ol Samting Yu Holim Em Inap Long Yu
1 Baibel i tok yumi mas lukautim famili bilong yumi long ol samting bilong skin, tasol nogut dispela i kamap olsem nambawan bikpela samting long yumi. Yumi mas putim ol samting bilong spirit i go pas. (Mt. 6:33; 1 Ti. 5:8) Long dispela taim bilong “planti hevi nogut tru,” i hatwok liklik long kisim stretpela tingting long ol dispela samting. (2 Ti. 3:1) Wanem samting bai helpim yumi?
2 Kisim Tingting Bilong Baibel: Baibel i tok pasin bilong wok strong long kisim planti mani kago samting em inap bagarapim yumi long ol samting bilong spirit. (Sav. 5:10; Mt. 13:22; 1 Ti. 6:9, 10) Yumi stap klostu long pinis, olsem na nogut yumi tingim tumas ol wok bilong skin o mani samting, na ol wok bilong spirit—ol miting, stadi, na autim tok—i kamap olsem nambatu samting bilong yumi. (Lu. 21:34-36) Baibel i tok: “Sapos yumi gat kaikai na laplap samting, orait yumi ken tok, ‘Em inap long mi.’ ”—1 Ti. 6:7, 8.
3 Dispela i no makim olsem ol Kristen i mas stap rabis tasol, nogat. Tasol em i helpim yumi long luksave long ol samting yumi mas i gat—kaikai, klos, na ples slip i stret long hap yumi sindaun long en. Sapos yumi gat ol dispela samting, orait yumi no ken wok strong i go i go long kisim planti kain kain samting moa. Taim yumi tingting long baim wanpela samting o kisim sampela wok mani moa, askim yumi yet, ‘Tru tru mi mas i gat dispela samting?’ Dispela bai helpim yumi long bihainim dispela tok: “Yupela i no ken bihainim pasin bilong mangal long mani. Yupela i mas ting olsem, samting yupela i holim pinis, em inap long yupela.”—Hi. 13:5.
4 Sapos yumi bilip strong long Jehova, em bai helpim yumi. (Snd. 3:5, 6) Tru, yumi mas wok strong long kisim kaikai samting bilong olgeta de, tasol yumi no save tingim ol samting bilong skin i nambawan bikpela samting. Maski yumi gat planti samting o liklik samting tasol, yumi save wet long Jehova long inapim yumi long ol samting yumi mas kisim. (Fl. 4:11-13) Taim yumi mekim olsem, God i save givim bel isi long yumi na planti blesing moa.
This article is repeated in km 4/04 entitled “Amamas Long Ol Samting Yu Gat.”