Yu Inap Kisim Ol Gutpela Samting!
1 Olsem wanem? Yu laik i stap belgut na amamas moa? Yu save kisim amamas long wok bilong helpim ol narapela? Yu gat laik long mekim bikpela wok moa bilong Jehova? Sapos yu tok yes long wanpela bilong ol dispela askim, ating gutpela yu tingting long mekim wok painia oltaim. Tru, i no olgeta inap mekim wok painia. Yumi mas tingim helt na strong bilong skin na wok bilong lukautim famili na sampela narapela wok em Baibel i tok yumi mas mekim.
2 Ol tok em spirit bilong God i kirapim Solomon long raitim i kamapim olsem blesing bilong Jehova i mekim na man i kisim ol gutpela samting bilong skin. (Snd. 10:22) Tasol long nau, blesing bilong Jehova i givim ol gutpela samting bilong spirit long yumi. Ol painia oltaim i save kisim planti bilong ol dispela gutpela samting. Olsem: Ol i kisim bikpela amamas moa taim ‘ol i redi oltaim’ long lusim ol samting bilong ol yet na bai ol i ken givim samting long ol narapela man. (Kl. 4:5; Ap. 20:35) Jehova i luksave na amamas long gutpela wok ol i mekim. Kain ‘gutpela samting long heven’ bai i no inap bagarap. (Mt. 6:20; Hi. 6:10) Na tu, taim ol painia i no wok long kisim planti samting bilong skin na ol i bilip long Jehova bai lukautim ol long ol samting ol i mas kisim, long dispela rot ol bai pas gut moa wantaim em.—Mt. 6:22, 25, 32; Hi. 13:5, 6.
3 Pasin bilong wok strong long kisim planti mani kago samting i kirapim ol man long “mekim planti samting nogut na dispela bai i paulim ol tru.” (1 Ti. 6:9, 10; Jem. 5:1-3) Blesing bilong Jehova i no save mekim olsem long ol man. Ol painia oltaim i save lusim bikpela hap taim long wok autim tok, na dispela i helpim ol long stap strong long ol samting bilong spirit na tingim ol samting i bikpela samting tru. (Fl. 1:10) Wanpela brata i lusim wok bilong em olsem ensinia, em wok i kisim bikpela hap taim, na em i kirap mekim wok painia. Em i tok: “Wok mani bilong mi i givim presa long mi, tasol wok painia i no save mekim olsem. Nau mi inap helpim ol man na lainim ol long tok i tru. Dispela wok i wanpela gutpela wok tru na i mekim bel bilong mi i amamas.”
4 Mekim Gut Long Ol Narapela: Long nau “planti hevi nogut tru” i save painim olgeta man. (2 Ti. 3:1) Ol manmeri long olgeta hap i mas i gat gutpela samting bilong bilip na wet long en. Ol man bilong autim tok bilong Kingdom i kisim bikpela amamas taim ol i helpim ol man i no gat gutpela samting bilong wetim long ol i ken kisim save long gutnius na bihainim. Olgeta painia oltaim i save lusim inap olsem 800 aua long olgeta yia long mekim dispela wok bilong helpim ol man long kisim laip, olsem na amamas bilong ol i bikpela tru!—1 Ti. 4:16.
5 Olsem wanem? Yu bin tingting long mekim wok painia oltaim? Bilong mekim olsem, ating yu mas lusim ol samting i no bikpela samting. (Ef. 5:15, 16) Planti i bin mekim olsem na ol i senisim sampela samting long sindaun bilong ol, na nau ol inap daunim ol aua ol i mekim wok mani bambai ol i ken lusim bikpela hap taim moa bilong mekim wok bilong Kingdom. Olsem wanem? Yu inap stretim sindaun bilong yu na bai yu ken insait long wok painia wantaim ol dispela bratasista?
6 Askim Jehova long givim savetingting long yu na bai yu inap wokim gutpela sediul. (Jem. 1:5) Yu inap wet long kisim wanem ol blesing? Planti gutpela samting bilong spirit! Jehova bai lukautim yu tu long ol samting bilong skin em yu mas kisim. (Mt. 6:33) Ol bratasista husat i traim Jehova long dispela samting, ol bai kisim ‘planti gutpela samting na ol i no ken sot.’—Mal. 3:10.
[Askim Bilong Stadi]
1. Bilong wanem i gutpela long tingting long mekim wok painia oltaim?
2. Kolim sampela gutpela samting bilong spirit ol painia oltaim i save kisim.
3. Olsem wanem pasin bilong painim ol gutpela samting bilong spirit i narapela kain long pasin bilong painim planti mani kago?
4. Olsem wanem ol painia oltaim i kisim blesing taim ol i mekim gut long ol narapela man?
5, 6. Wanem samting inap helpim yu long kamap wanpela painia oltaim?