Askim

◼ I stret odiens i paitim han long pinis bilong olgeta tok bilong Skul Tiokratik Bilong Autim Tok na Miting Bilong Wok?

Taim Man Bilong Wokim olgeta samting, em Jehova, i wokim graun, “ol sta i bin lukim na ol i amamas na singim song, na ol ensel i amamas na singaut.” (Jop 38:⁠7) Ol dispela pikinini bilong God, em ol ensel, ol i laik litimapim nem bilong Jehova long nambawan gutpela wok bilong em long wokim ol samting, em nupela rot we em i kamapim savetingting, gutpela pasin, na strong bilong em.

Em i gutpela samting tru long yumi kamapim amamas bilong yumi long hatwok ol bratasista bilong yumi i mekim na long ol tok na soim bilong ol. Olsem: Yumi save paitim han long ol tok na soim i save kamap long ol spesel bung, olsem ol kibung. Ol bratasista i bin lusim bikpela hap taim na wok strong long redim ol tok na soim bilong kibung. Pasin bilong paitim han i soim olsem yumi pilim tru hatwok bilong brata i mekim tok, na tu, yumi amamas long ol tok Jehova i givim long rot bilong Baibel na oganaisesen bilong em.​—⁠Ais. 48:17; Mt. 24:​45-​47.

Olsem wanem long pasin bilong paitim han long ol tok na soim bilong Skul Tiokratik Bilong Autim Tok na Miting Bilong Wok? I no gat lo i tambuim pasin bilong paitim han sapos bel i kirapim yumi long mekim, kain olsem taim sumatin i mekim namba wan tok bilong em long skul. Tasol pasin bilong paitim han inap kamap olsem wanpela pasin yumi mekim nating tasol. Olsem na yumi no save paitim han long pinis bilong olgeta tok na soim.

Maski yumi no save paitim han long planti tok na soim bilong Skul Tiokratik Bilong Autim Tok na Miting Bilong Wok, i gat ol narapela rot we yumi olgeta i ken kamapim amamas bilong yumi long ol tok yumi harim na hatwok bilong ol bratasista i mekim ol tok. Yumi ken mekim olsem long rot bilong putim gut yau long man i mekim tok. Na bihain long miting, yumi inap go long brata o sista na tok tenkyu long hatwok em i mekim.​—⁠Ef. 1:​15, 16.