Olsem Wanem? Rot i Op Nau Long Yu Mekim Wok Painia?
1 Yia-teks bilong yumi long 1999 i kirapim yumi long tingim olsem yumi stap yet insait long “taim bilong God i kisim bek yumi.” (2 Ko 6:2) Tasol klostu nau dispela taim bilong God i kisim bek yumi bai pinis. Na “De bilong bikpela kot bilong God” bai kirap. (2 Pi 2:9) Jehova i wok yet long givim rot long ol man bilong helpim ol long abrusim bagarap, na yumi amamas tru long lukim planti manmeri i wok long harim tok, na dispela lain i wok long kamap planti moa!
2 Lain bilong Jehova i wok strong nau bilong helpim ol man paslain long dispela bikpela bagarap i kamap. Bilong wok strong olsem, planti pablisa i insait long wok painia. Olsem wanem? Rot i op nau long yu mekim wok painia? Bilong wanem yumi mekim dispela askim?
3 Ol i Pilim Tru: Olsem Wok Kingdom bilong Janueri 1999 i kamapim, namba bilong aua ol painia oltaim na painia haptaim i mas kisim em i go daun. Bilong inapim dispela nupela aua, ol painia oltaim i mas kisim 70 aua long wok autim tok long olgeta mun, olsem 840 aua long olgeta wan wan yia bilong wok. Ol painia haptaim bai kisim 50 aua long wok autim tok. Long daunbilo mipela i kamapim tok bilong sampela bilong planti brata sista em ol i bin pilim tru dispela senis:
“Wanpela gutpela blesing tru yumi kisim long Papa bilong yumi long heven!”
“Dispela senis i mekim na bai mipela i no hatwok long winim aua bilong mipela!”
“Mipela i beten olsem planti moa i ken insait long wok painia na kisim ol blesing Jehova i save givim long ol man i mekim moa yet wok bilong em.”
4 Taim yumi kam klostu long pinis bilong dispela taim bilong God i kisim bek yumi, yumi save Jehova i laik bai ol manmeri bilong em i mas litimapim moa yet nem bilong em paslain long pinis i kamap. Wok i kamap bikpela na i kamap gutpela moa, long wanem, (1) namba bilong ol lain bilong autim tok bilong Kingdom i go bikpela long olgeta taim, na (2) olgeta wan wan i painim rot bilong mekim moa yet wok bilong autim tok bilong Kingdom inap long skel bilong ol. Taim Jehova, em man bilong “mekim kaikai i kamap,” em i blesim ol dispela lain i givim bel na long laik bilong ol yet ol i mekim wok, ol dispela gutpela samting i wok long kamap.—1 Ko 3:6, 7; Sng 110:3.
5 No Ken Lusim Marimari Bilong Em: Taim Pol i toktok long dispela taim bilong Jehova i kisim bek yumi, em i tokim ol wanwok Kristen olsem: “Mipela i save wok wantaim God na mipela i tok strong long yupela olsem, ‘Yupela i kisim pinis marimari bilong God, na nogut yupela i lusim nating marimari bilong em.’ ” Sapos yumi pilim dispela i olsem “taim bilong God i mekim gut” long ol man na kisim bek ol, bai yumi no “lusim nating marimari bilong em,” na long olgeta taim rot i op, bai yumi wok strong long helpim ol. (2 Ko 6:1, 2) Long nau, em i bikpela samting long yumi mas tingim tok bilong Pol. Ol Kristen i laikim tumas Jehova, ol i tingim olsem em i gutpela samting tru long insait tru long wok em i bin givim long ol. Olsem wanem? Nau yu inap mekim wok autim tok olsem wanpela painia oltaim?
6 Yumi Inap Winim Dispela Mak: Long Papua Niugini, yumi laik bai i gat 200 painia oltaim long Septemba 1. Mipela i bilip olsem yumi inap winim dispela mak. Bilong wanem yumi bilip tru olsem? Long Mas 1997, inap 259 brata na sista i bin mekim wok painia haptaim, na long Epril 1998, i gat 285 i mekim dispela wok. Planti bilong ol i bin kisim 60 aua—10 aua moa na bai ol inap winim nupela aua ol painia oltaim i mas kisim! Olsem na sapos 50 bilong ol dispela brata sista, em ol i bin mekim wok painia haptaim, ol i kamap painia oltaim paslain long pinis bilong dispela yia bilong wok, orait kirap long Septemba bai yumi gat 200 samting painia oltaim i mekim wok!
7 Ol i Mas i Gat Sedyul: Olsem wanem? Yu ting i hatwok yet long kisim 70 aua long wanpela mun? Sapos olsem, orait tingting long kisim 17 aua long wanpela wik. Mekim wok long sedyul i stap long narapela pes, na traim long wokim wanpela sedyul i stret long yu bilong mekim wok painia oltaim. Taim yu laik wokim sedyul bilong yu, toktok wantaim ol painia i bin mekim wok longtaim na kisim sampela gutpela tingting long ol long olsem wanem ol i save stretim gut wok bilong ol bambai ol inap mekim wok painia na ol i mekim sampela wok bilong ol yet na bilong famili tu. Askim wasman sekit long olsem wanem ol painia long sekit i save stretim sedyul bilong ol long olgeta wan wan wik. Nau yu ken askim Jehova long blesim ol samting yu mekim bilong redi long mekim wok painia.—Snd 16:3.
8 Wok Bilong Olgeta Insait Long Famili: Famili olgeta i ken sindaun wantaim na stori olsem sapos ol i skelim gut ol samting na wok gut wantaim, orait wanpela o tupela insait long famili i ken mekim wok painia. Yumi save, taim sampela i skelim gut sindaun bilong ol, ol i save olsem ol i no inap mekim wok painia oltaim. Sapos olsem, yu ken putim mak long mekim wok painia long bihain. Tasol kirap nau long stretim rot na makim wanpela taim stret bilong yu ken kirap mekim wok painia. Ating yu ken mekim wok painia haptaim wanpela o tupela taim insait long yia bambai dispela i ken redim yu long kamap painia oltaim.
9 Inap 150 samting painia oltaim i mekim wok long Papua Niugini na sindaun bilong ol i narapela narapela. Sampela i gat sik, na planti bilong ol i gat famili bilong lukautim na ol i wok mani samting. Sampela i winim 50 krismas, na wan wan ol i winim 60 krismas. Sampela i singel, na sampela i gat 20 krismas o 19 o 18 krismas samting. Klostu 30 pesen bilong olgeta painia ol i brata, na planti bilong ol i gat wok bilong lukautim famili na kongrigesen. Olgeta dispela brata na sista i bin stretim gut ol wok bilong ol bambai ol i gat taim bilong mekim wok painia—ol i no tingting long holim planti samting bilong skin; ol i amamas long liklik samting tasol ol i holim.—Kl 4:5, NW.
10 Yu Mas Lusim Sampela Samting i Pulim Bikpela Hap Taim Bilong Yu? Taim yu lusim sampela samting i save pulim bikpela hap taim bilong yu, dispela inap opim rot bilong yu ken mekim wok painia. Senisim sindaun bilong yu na ating dispela bai helpim yu na bai yu inap mekim wok painia. Olsem wanem? Yu inap katim sampela hap taim yu save lusim long mekim wok bilong skin? Yu inap katim sampela hap taim yu save lusim long mekim samting i no bikpela samting tumas, o yu inap skelim gut taim bilong yu bilong mekim ol samting bilong kisim amamas?
11 Long 1 Timoti 6:8, Baibel i tokim yumi: “Sapos yumi gat kaikai na laplap samting, orait yumi ken tok, ‘Em inap long mi.’ ” Sapos yumi holim liklik samting tasol bilong skin, dispela i bikpela samting tru bilong helpim yumi long wok strong long mekim wok bilong Jehova, na i helpim yumi na bai yumi ken putim ol samting bilong spirit i stap namba wan. (Mt 6:22, 33) Stori long ripot bilong Japan long yiabuk bilong 1998, pes 104, i kamapim sampela as na planti long Japan i mekim wok painia.
12 Long olgeta hap bilong graun, ol wokboi bilong God i wok strong tru long autim gutnius paslain long de bilong Jehova long kisim bek yumi em i pinis. Yumi amamas tru, long yia i go pinis inap 700,000 brata sista i bin insait long wok painia long olgeta wan wan mun. Olsem wanem? Inap yu senisim sampela samting long sindaun bilong yu bambai yu ken insait tu long dispela wok? Mipela i laik bai yu beten na skelim gut ol samting long sindaun bilong yu taim yu bekim dispela askim: “Olsem wanem? Rot i op nau long yu mekim wok painia?”
[Rait long pes 3]
MIPELA I LAIKIM: 200 PAINIA OLTAIM!
[Blok long pes 4]
Sampela Sedyul Bilong Wok Painia Oltaim
Mas kisim: 17 aua long wanpela wik
Wanpela De Long Wik na Sarere Sande
De Ol Aua
Fraide 8
Sarere 6
Sande 3
Ol Aua Olgeta: 17
Tupela De Long Wik na Sarere
De Ol Aua
Tunde 7
Fonde 7
Sarere 3
Ol Aua Olgeta: 17
Tripela De Long Wik na Sande
De Ol Aua
Mande 5
Trinde 5
Fraide 5
Sande 2
Ol Aua Olgeta: 17
Tupela Apinun na Sarere Sande
De Ol Aua
Mande 3
Trinde 3
Sarere 8
Sande 3
Ol Aua Olgeta: 17
Wokim Sedyul Bilong Yu Yet Long Mekim Wok Painia Oltaim
De Ol Aua
Mande
Tunde
Trinde
Fonde
Fraide
Sarere
Sande
Ol Aua Olgeta: 17