Nupela Program Bilong Kibung Sekit
1 Bilong yumi inap sanap strong long bilip long dispela taim bilong hevi, yumi mas bilip long Jehova. Olsem wanem yumi inap kamapim dispela bilip long ol samting yumi mekim long i stap bilong yumi? Pasin bilong bilip long Jehova i mekim wanem long i stap bilong yumi yet na long famili? Olsem wanem em i helpim yumi long sakim ol samting bilong dispela graun em Satan i bosim? Program bilong kibung sekit bilong 2003 bai bekim ol dispela askim. As tok bilong kibung em “Bilip Tru Long God na Mekim Gutpela Pasin.”—Sng. 37:3.
2 Long taim i gat sampela bikpela samting i kamap o long taim yumi gat bikpela hevi tru, i no long dispela taim tasol yumi laik bilip long Jehova, nogat. Yumi kamapim olsem yumi bilip long Jehova long ol samting yumi mekim long olgeta de. Namba wan tok bilong kibung, “Yu Mas Bilip Long Jehova Long Olgeta Taim” i strongim dispela tok. (Sng. 62:8) Tok i gat 4-pela hap bilong en “Kamapim Klia Olsem Yu Bilip Long Jehova” bai soim yumi rot bilong painim na bihainim ol tok Baibel i as bilong en, em ol tok inap helpim yumi long mekim marit i kamap gutpela, stretim ol hevi i kamap insait long famili, na long mekim ol samting na bai yumi inap kisim ol samting bilong skin yumi mas kisim.
3 Ol samting bilong dispela graun Satan i bosim i laik paulim tingting bilong yumi long wanem samting i stret na wanem samting i no stret, na wanem ol samting i mas i stap nambawan long laip bilong yumi. (Ais. 5:20) Dispela tupela tok “Yumi Mas Was Gut Long Ol Samting i No Gat As Bilong En” na “Givim Baksait Long Pasin Nogut na Mekim Gutpela Pasin,” ol bai strongim tingting bilong yumi long holimpas ol stretpela lo bilong Jehova.—Amo. 5:14.
4 Taim Jehova i pinisim ol pasin nogut bilong nau, ol wokboi bilong God bai i gat wok long bilip tru long em. Dispela i kamap klia long pablik-tok, “Taim Bilong God Long Kisim Bek Yumi Long Ol Hevi Bilong Graun i Klostu Pinis.” Bihain long dispela tok, ol bai kirapim yumi long skelim yumi yet long rot bilong tok “Olsem Wanem? Bai Yu Inap Tru Long i Stap Long Kingdom Bilong God?” Program bai pinis long wanpela tok i kirapim yumi long “Bilip Long Ol Tok Promis Bilong Jehova.”
5 I gutpela yumi olgeta i stap long program olgeta bilong dispela kibung sekit na bai yumi inap strongim pasin bilong yumi long bilip long Jehova.—Sng. 118:8, 9.