Jehova i Save Helpim Ol Man i Bilip Long Em
1 Planti man i tingim mani, strong, na save bilong man em ol bikpela samting bilong helpim ol man long i stap gut. (Sng. 12:4; 33:16, 17; 49:5, 6) Tasol ol man i pret long Jehova na bilip long em, Baibel i strongim ol olsem Jehova ‘i save helpim na lukautim ol.’ (Sng. 115:11) Yumi ken stori long tupela samting we yumi mas kamapim olsem yumi bilip long Jehova.
2 Olsem Ol Wokman Kristen: Taim yumi mekim ol asainmen long kongrigesen o mekim wok tisa long wok autim tok, yumi mas bilip olsem God bilong yumi bai helpim yumi. Tingim pasin bilong Jisas. Maski em i Pikinini Bilong God, em i no bilip long savetingting o strong bilong em yet, nogat, em i bilip tru olsem Papa bilong em long heven bai helpim em. (Jo. 12:49; 14:10) Em i bikpela samting moa yet long yumi mas mekim wankain pasin! (Snd. 3:5-7) Long strong na helpim bilong Jehova tasol bai wok bilong yumi inap givim biknem long em na helpim ol arapela.—Sng. 127:1, 2.
3 Yumi kamapim olsem yumi bilip tru long Jehova taim yumi beten long em i stiaim yumi na helpim yumi long holi spirit bilong em. (Sng. 105:4; Lu. 11:13) Na tu, yumi kamapim olsem yumi bilip long God taim tok bilong em long Baibel i as bilong ol tok yumi skulim ol man long en. Tok bilong God i gat strong long kirapim ol man long senisim pasin bilong ol. (Hi. 4:12) Taim yumi “helpim ol arapela man” na “mekim dispela wok long strong God i save givim,” Jehova i kisim biknem long dispela.—1 Pi. 4:11.
4 Karim Ol Hevi: Yumi mas askim Jehova long helpim yumi taim yumi gat hevi. (Sng. 46:1) Olsem: Ating bos long ples wok i no laik givim malolo na bai yumi ken i go long kibung, o wanpela bikpela hevi i kamap insait long famili. Ating ol wantok i strong long yumi mas insait long sampela kastam bilong ples o ol arapela samting em yumi save Jehova i no orait long en. Yumi kamapim olsem yumi bilip long Jehova taim yumi beten strong long em na bihainim ol tok em i givim long rot bilong Baibel na oganaisesen bilong em. (Sng. 62:8; 119:143, 173) Taim ol wokboi bilong Jehova i mekim olsem, ol i save pilim olsem Jehova i helpim ol.—Sng. 37:5; 118:13, 16.
5 Jehova yet i strongim yumi olsem: “Sapos man i bilip strong long mi, Bikpela, na i save mi tasol mi inap helpim em, orait bai mi mekim gut tru long dispela man.” (Jer. 17:7) Long olgeta samting yumi mekim, i gutpela yumi kamapim olsem yumi bilip tru long em!—Sng. 146:5.