Tingim Tru “Ol Pikinini Man, Papa Bilong Ol i Dai Pinis”
1 Jehova em i save lukautim “ol pikinini man, papa bilong ol i dai pinis.” (Sng. 68:5, NW ) Em i laik ol i stap gut na dispela tingting bilong em i kamap ples klia taim em i tokim lain Israel olsem: “Yupela i no ken mekim nogut long meri, man bilong en i dai pinis, o long pikinini, papa i dai pinis. Sapos yupela i mekim nogut long ol na ol i krai long mi long helpim ol, bai mi harim singaut bilong ol.” (Kis. 22:22, 23) Na tu, Lo Bilong God i tok ol manmeri i mas helpim kain lain olsem long ol samting bilong skin. (Lo 24:19-21) Taim kongrigesen Kristen i kamap, ol lain i lotu tru long God ol i mas ‘tingting long ol pikinini, papamama bilong ol i dai pinis, na long ol meri, man bilong ol i dai pinis, na ol i mas helpim ol long karim ol hevi bilong ol.’ (Jems 1:27) Olsem wanem yumi inap bihainim pasin bilong Jehova long tingim ol pikinini em ol i wok long kamap bikpela long famili i gat papa o mama tasol o long famili ol i no wanbel long lotu?
2 Skulim Ol Long Ol Samting Bilong Spirit: Sapos yu wanpela mama o papa wanpis o poroman marit bilong yu i no bilip, i hatwok long stadi long Baibel long olgeta taim wantaim ol pikinini bilong yu. Tasol pasin bilong stadi gut long Baibel long olgeta wik, em i bikpela samting bilong helpim ol pikinini long kamap bikpela man i save skelim gut ol samting. (Snd. 22:6) Pasin bilong toktok wantaim ol long olgeta de long ol samting bilong spirit em i bikpela samting tu. (Lo 6:6-9) Sampela taim, ating bai yu pilim olsem yu no inap mekim dispela wok, tasol no ken les kwik. Askim Jehova long givim strong long yu na soim rot long yu taim yu wok long “stretim gut ol pikinini bilong yupela na skulim ol long tok bilong Bikpela.”—Ef. 6:4.
3 Sapos yu laik kisim sampela helpim long mekim ol wok em Baibel i tok yu mas mekim, tokim ol elda long en. Ol inap givim sampela gutpela tok long yu o ol i ken helpim yu long mekim lista bilong ol samting bilong spirit yu mas mekim bilong helpim famili bilong yu.
4 Olsem Wanem Ol Narapela Inap Helpim Yu: Long taim bilong ol aposel, Timoti i kamap gutpela wokboi bilong Jehova maski em i kamap bikpela long famili i no wanbel long lotu. Mama na bubu meri bilong em ol i bin wok strong long skulim em long “ol buk i gat tok bilong God” long taim em i yangpela, na dispela i mekim bikpela samting long i stap bilong em. (Ap. 16:1, 2; 2 Ti. 1:5; 3:15) Tasol em i kisim helpim tu taim em i poroman wantaim ol narapela Kristen, wanpela bilong ol em aposel Pol, em i tok long Timoti olsem, “em i olsem pikinini bilong mi, na mi laikim em tru. Em i save lukautim gut wok bilong Bikpela.”—1 Ko. 4:17.
5 Long nau tu, sapos ol strongpela brata sista i tingim tru ol pikinini insait long kongrigesen em ol i no gat papa o mama, dispela inap helpim tru ol! Yu save long nem bilong olgeta dispela pikinini? Yu save toktok wantaim ol long ol miting Kristen na long ol narapela taim tu? Singautim ol long wok wantaim yu long autim tok. Ating sampela taim yu ken singautim ol wantaim papa o mama wanpis bilong ol o papa o mama bilong ol i bilip na ol i ken bung wantaim yu long famili-stadi o long taim bilong amamas. Taim ol dispela yangpela i tingim yu olsem pren bilong ol, ating dispela bai helpim ol long bihainim gutpela pasin bilong yu na ol bai kisim tok bilong yu long strongim ol.—Fl. 2:4.
6 Jehova i save tingim tru ol pikinini man na pikinini meri em ol i no gat papa, na em bai blesim ol hatwok bilong yumi long helpim ol long pilim gut tok i tru. Planti em ol i kamap bikpela long ol famili i gat mama o papa tasol o famili i no wanbel long lotu, ol i kisim ol tok bilong strongim ol na nau ol i mekim wok olsem painia, kongrigesen sevent, elda, wasman raun, misineri, o ol i mekim wok long Betel. Gutpela yumi olgeta i painim sampela rot bilong “givim bel” long helpim ol pikinini i no gat papa, na long dispela rot yumi bihainim pasin bilong Papa bilong yumi long heven.—2 Ko. 6:11-13.